24

Kırk Altıncı Madde
Tahrir komisyonları her karyenin tahririni ikmal eylediklerinde sicil müsveddelerinin zeylini cemaat meclislerine ve imam ve muhtarlara mühürleteceklerdir. İşbu müsveddeler mevalid ve münakehat üzerine müretteb olacaktır.

Kırk Yedinci Madde
Sicil müsveddeleri ahalisi muhtelit olan mahallerde her cemaatin adedince başka başka olacak ve her kazanın tahriri hitam buldukda komisyonların avdeti üzerine kaza nüfus memurları sicil-i asliyi tanzim ederek ilk üçüncü ay hitamında on üçüncü madde mucibince suretlerini ve icmal cetvellerini re’s-i livaya göndereceklerdir. Liva ve vilayet merkezlerinden dahi yine zikrolunan on üçüncü maddeye tevfikan Dersaadet Nüfus İdare-i Umumiyesine irsal kılınacaktır. Ve idare-i mezkûre dahi dahil-i esnan olan nüfusun cetvellerini tanzim ederek Daire-i Askeriyeye ita edecektir.

Kırk Sekizinci Madde
İşbu nizamnamenin sicil-i nüfus vukuatı hakkındaki mevadının ve mücazata dair ahkâmının icrası tahrir komisyonlarının nüfus-ı mevcudeyi tahkik ve kayd eylediklerini mütaakib Dahiliye Nezareti tarafından neşrolunacak ilan tarihinden muteber olacaktır. Bu ilanlar her vilayetin muamelat-ı tahririyesine hitam buldukça icra kılınır.

Kırk Dokuzuncu Madde
Nüfus Nazırı ve memurlarının işbu nizamname mucibince tafsilat-ı vezaifini havi Nüfus-ı Umumiye İdare-i Merkeziyesi canibinden talimat-ı mahsusa ita olunacaktır.

Ellinci Madde
Dahiliye Nezareti işbu nizamnamenin icrasına memurdur.

İrade-i Seniyye Tarihi
Fi 8 Şevval sene 98 ve fi 21 Ağustos sene 97

---

Bin sekiz yüz seksen senesi Kânun-ı Evvelinin beşinci günü Rumeli Şarkî Vilayeti Meclis-i Umumisinden bil-kabul meriyeti hakkında irade-i seniyye-i hazret-i padişahi müteallik ve şeref-sudur buyurulan Tahrir-i Emlak Kanunnamesinin üçüncü maddesinin ikinci fıkrasındaki sehvin tadil ve ıslahı bil-icra tekrar tasdik-i aliye arzı zımnında asıl ve sahihi ber-vech-i zir beyan olunur.

( Üçüncü )