59

İstimal olunan fenerleri hüsn-i halde muhafazaya ve’l-hasıl geceleri jandarma hizmetini
ifa zımnında iktiza-yı halde zabıtanın muavenetini talebe memurdur.

Altıncı madde — Bir harik zuhurunda irsal olunacak kuvve-i imdadiyenin kumandanlığı
daire-i belediye tarafından tanzim olunmuş olan nizamname-i mahsusa tevfikan icra olunacaktır.

Yedinci madde — Belediye memurları aynile kara zabıta memurları misillü tayin olunurlar
ve anların karada mükellef olduğu hizmeti bunlar şehirlerde icraya memur olarak zabıta-i
kara kanunnamesine tabi bulunurlar.

Sekizinci madde — Zabıta-i belediye komiserleri ile memurlara mahsus üniforma
labis olacaklar ve gece bekçileri dahi devair-i belediyenin tayin edeceği alamatı haiz
bulunacaklardır.

Dokuzuncu madde — Gece bekçileri bekçilik ettikleri mahalle ahalisi tarafından tayin
olunup oradan tavzif olunurlar ancak hizmetleri müdür tarafından tasdik edilir.
Her bir mahallede ne kadar bekçiye lüzum olduğunu daire-i belediye meclisi tayin eder ve bunların
maaşlarını sair virgü ile beraber tahsil eyler.

Onuncu madde — Devair-i belediye meclislerinin kararnameleri ile idare-i umumiye nizamnameler
mucibince zabıta-i belediye tarafından ahz olunan ceza-yı nakdi daire-i belediye sandığı
menafiine hasr edilir.

İrade-i seniye tarihi: fi 20 Rebiülahir sene 298 ve fi 25 Mart sene 297

***

Nam-ı nami-i hazret-i padişahiye olarak nizamname-i dahilinin onuncu ve elli dördüncü
ve dört yüz seksen beşinci maddeleri mucibince Rum İli Şarkinin (Kadastro)
tahrir-i emlaki hakkında bit-tanzim bin sekiz yüz seksen senesi Kanun-ı Evvelinin beşinci
günü meclis-i umumi-i vilayetten kabul olunup ledü’l-arz meriyeti hakkında irade-i
seniye-i hazret-i padişahi müteallik ve şeref-sudur buyurulan işbu kanunun valisi bulunduğum
Rum İli Şarki vilayetinde mer’iyyü’l-icra tutulmasını ilan eylerim.

Kadastro (Tahrir-i Emlak Kanunnamesi)

Rum İli Şarki (Kadastrosu) tahrir-i emlaki üç kısma taksim olunmuştur.
Bunların birinci yalnız aşar ve nakdiyeden başka ve virgü virilmeyen arazinin bilcümle...