65

tednîsi ne esbâb ve ahvâl hasebiyle vâki olduğu dahi bir sûret-i müdakkakanede taharrî edilecektir.

Otuz ikinci madde — Her cemaatte (Kadastro) defteri unvanıyla bir defter bulunup bunda o cemaat emlâki mücmelen mukayyet bulunacak ve cemaatin mensup olduğu sancak ve nahiyede ne kadar arâzi bulunduğu ve kaç sınıf olduğu ve ne kadar vâridât verdiği defter-i mezkûrda tasrih kılınacaktır.

Otuz üçüncü madde — Vâridâtın sûret-i tayininden dolayı ihlâl-i menâfiini mucip olacak bir hal görenler olduğu halde Sancak Deâvî İdare Meclisine bidâyeten ve Divân-ı Deâvî İdareye istinâfen müracaat edebilir.

Otuz dördüncü madde — Vâridâtın keyfiyet-i tayinine dair vuku bulacak tebliğden itibaren üç ay zarfında her cemaatin işbu tayin-i vâridât aleyhinde iddia ve şikâyete hakkı olup bu müddetin inkızâsında hak ve salâhiyetten mahrum olacaktır.

Otuz beşinci madde — Muvakkat kadastronun ikinci faslının mevki-i icrâya vaz’ını müteakip üçüncü faslının icrâsına bed’ olunacaktır.

Üçüncü Fasıl
( Emlâkin kısmen mesâhasıyla ve cins ve kabiliyetlerinin aksâm-ı mütenevviaya taksimiyle vâridâtın derecâtına dairdir )

Otuz altıncı madde — Kısmen mesâha edilecek olan emlâk ikinci sınıf mühendisleri tarafından Sancak Mühendisi nezâretiyle icrâ olunur.

Otuz yedinci madde — Kısmen mesâha edilen emlâk cemaat komisyonu vasıtasıyla emlâk sâhibi zuhûrunda icrâ olunur. Ashâb-ı emlâkin gıyâbıyla yerine sûret-i meşrûada tayin olunmuş bir vekil bulunmadığı takdirde vekâlet hizmetini mensup olduğu cemaatin ihtiyar meclisi icrâ eder. Ashâb-ı emlâk sabî bulunduğu halde vasîsi vekâlet eyler.

Otuz sekizinci madde — Kısmen mesâha edilmiş olan arâzi ve emlâkin planları mühendis tarafından Sancak Mühendisine gönderilip bu mühendis dahi planı muayene ve tedkik ettikten sonra Vilâyet Mühendisine irsâl eyler ve Vilâyet Mühendisi dahi mezkûr planlar üzerine cemaatin umûmî planını tanzim eyler.