70

Birinci Madde: Biñ sekiz yüz yetmiş dokuz senesi Kânûn-ı Evveliniñ yirmi ikinci târîhiyle müverrah yaplan kânûnuñ altıncı maddesi ber-vech-i zîr ta'dîl olunmuşdur. Temettü' vergisi yüzde üç i'tibâriyle ahz u istîfâ olunacakdır.

İkinci Madde: İşbu temettü' vergisi hâsılâtından öşür istîfâ olunan emlâk ve arâzîden ahz olunmaz.

Üçüncü Madde: Evvelki kânûnuñ sekizinci maddesi zîrde gösterilen suver-i selâse vechle tashîh ve ta'dîl olunmuşdur şöyle ki:

Evvelâ: Kayd olunan ahâlî-i kâffeniñ emlâk mutasarrıflarınıñ ta'yîn-i mikdâr-ı kıymeti mahallât ve kurâ dâirelerinde tertîb olunacak bir veyâ bir kaç kômisyon ma'rifetiyle icrâ kılınacak tahmînâta binâ edileceklidir.

Sâniyen: Mezkûr kômisyonlarıñ icrâ edecekleri mu'âmele-i kaydiyye ve tahmîniyye kazâ kâim-makâm ve tahsildârları ma'rifetiyle teftîş ve tedkîk olunacakdır.

Sâlisen: Bâlâda zikr olunan mu'âmele-i kaydiyye ve tahmîniyye defâtiriniñ sancak mâliye me'mûrîniñ taht-ı riyâsetinde bulunan meclis-i mâliye-i livâ ma'rifetiyle tedkîkâtı icrâ olunup kararlaştırılacak ve bu meclis zuhûr edecek mükellefîniñ şikâyâtını istimâ' edecekdir. Bu meclisiñ kararları derece-i evveliyyede vilâyet mâliye müdîriyyetinde ve derece-i sâniyede Dîvân-ı 'Âlî-i Muhâkemâtıñ hukuk şu'besinde istînâfen rü'yet olunur.

İrâde-i seniyye târîhi fî 20 Rebîü'l-âhir sene 98 ve fî 25 Mart sene 97

***

( Domuz rüsûmu hakkında kânûn )

Nizâmnâme-i Dâhiliye'niñ onuncu ve elli beşinci maddeleri ahkâmına istinâden biñ sekiz yüz seksen senesi Teşrîn-i Evveliniñ yirmi beşinci günü Meclis-i Umûmî-i Vilâyetden kabûl olunup lede'l-arz mer'iyyeti hakkında müteallik buyurulan irâde-i seniyye mûcibince nâm-ı nâmî-i Hazret-i Pâdişâhîye olarak Rum İli Şarkî'de işbu kânûnuñ neşrini i'lân eylerim.

Birinci Madde: Nizâmnâme-i Dâhiliye'niñ dokuz numrolu zeylindeki yirmi ikinci bendiñ ta'dîliyle aña kâim olmak üzere zîrde muharrer bend-i hükmî cârî olacakdır.

İkinci Madde: Senede bir def'a olmak üzere domuzdan hayvan başına altun ... (olarak)