72

Bir lisan okumağa mecbur değil ise de elsine-i atika ve hazıradan kangılarını ister ise anları kendi mekteblerinde tahsil ve anların üzerine tedris etdimeğe muhtardır.

Altıncı Madde
Ulûm-ı mezhebiyenin emr-i tedrisi mektebin aid olduğu cemaat-i mezhebiye rüesa-yı ruhaniyesinin nezaret-i mahsusası tahtında olup ulûm-ı mezhebiyenin programı dahi rüesa-yı mûmaileyhim tarafından tertip ve tanzim olunacaktır.

Yedinci Madde
Hiç bir çocuğa kendi dininden başka bir din talim etdirilemeyecektir.

Sekizinci Madde
Âdâb ve ahlâk ve kabiliyetçe işbu kanunun ve maarife dair idare-i umumiye nizamnamelerinin tazammun eylediği evsaf ve şeraiti câmi olanlar kangı millet ve mezhebe mensub olurlar ise olsunlar mekteb küşad ve idaresine salâhiyetleri vardır.

Dokuzuncu Madde
Mebâdi-i tedris yedi yaşını ikmal eden zükûr ve inas bilcümle atfal içün mecburidir ve mecburiyet atfalin on üç yaşını ikmal edinceye kadar imtidad eder.

Onuncu Madde
Bir çocuğun pederi veyahut vasisi intihab eylediği muallim veyahut muallimenin kanunen matlûb olan âdâb ve ahlâk ve evsafı câmi olduğunu isbat eder ise o halde çocuğunu mekâtib-i umumiyeye göndermeyerek kendi hanesinde de talim ve tedris etdirebilür.

Fasl-ı Sani

( Mekâtib-i İbtidaiye ve Mebâdi-i Tedris Hakkında )

On Birinci Madde
Mebâdi-i tedrisden maksad sıbyanın dini ve edebi terbiyesiyle kabiliyet-i akliye ve cismaniyelerini yetişdirerek cemiyet-i beşeriye miyanında her kese lâzım ve yarar malûmatı virmekden ibaretdir.

On İkinci Madde
Vilayet ve elviye ve kaza veyahut kura ahalisi tarafından tesis ve idare olunan mekâtibe mekâtib-i ibtidaiye-i umumiye ve efrad veya cemiyet-i mahsusa tarafından tesis ve idare olunan mekâtibe mekâtib-i ibtidaiye-i hususiye ıtlak olunur.

On Üçüncü Madde
Mebâdi-i tedris derece-i ûlâ ve derece-i saniye itibariyle iki kısma mınkasimdir.

Beher sınıfı birer sene mütedavil olmak üzere derece-i ûlâ mebâdi-i tedris dört sınıfden ve derece-i saniye iki sınıfden ibaretdir.

( On )