76

Otuz yedinci madde: Baş muallim mektebin idaresi ve nezareti vazifesiyle mükellefdir. Program-ı umumi mündericatıyla mektebin intizamına ve şakirdanın husul-i terakkiyatına dair olan ahkâm-ı nizamiyenin tamam-ı icrasına mumaileyh sarf-ı mesai ve gayret edecektir.

Otuz sekizinci madde: Muallimlerin sıfat-ı memuriyetlerine uymayan diğer bir idare memuriyetiyle meşgul veyahut ticaret ve sanat ve sair işlerle mütevaggıl olmaları memnudur. Mülahazat emr-i tedrise mahsus ve münhasır olan evkat haricinde olmak şartıyla muallimlerin ibadethanelerde musikilik ve karye kitabeti hizmetlerini ifa etmelerine Sancak Mekâtip Meclisi müsaade edebilir.

Otuz dokuzuncu madde: Muallimin maaşı aid olduğu cemaatin ihtiyar meclisi tarafından bi't-tahsis on iki takasit-i mütesaviyeye taksim olunarak her mah nihayetinde Mekteb Encümeni tarafından tesviye olunur.

Kırkıncı madde: Muallimler ber-vech-i âti üç sınıfa mürettebtir.
Nüfusu iki binden mütecaviz olan kasaba ve karye veyahut nahiye fırkalarının mekâtip-i ibtidaiye muallimleri sınıf-ı evvel itibar olunur.
Ahalisi binden iki bine kadar olan kasaba ve karye cemaatlerinde veyahut fırkalarında mevcud mekâtip-i ibtidaiye muallimleri sınıf-ı sanidir.
Ahalisi binden aşağı bulunan kasaba ve karye cemaatlerinde veyahut fırkalarında mevcud mekâtip-i ibtidaiye muallimleri sınıf-ı salistir.
Kasaba ve kurâ nüfusuna nisbeten muallimlerin sunuf-ı mürettebe defteri Elviye Mekâtip Meclisi tarafından tertip ve tanzim olunur.

Kırk birinci madde: Sunuf-ı muhtelife muallimlerinin akall-i miktar-ı maaşat-ı seneviyeleri vech-i âti üzeredir.

Sınıf-ı evvel muallimin akall-i maaş-ı senevisi 6000
» sani » » » » 4500
» salis » » » » 3000 kuruşdur.

Sunuf-ı mezkûreden hangisinden olursa olsun muallimlere oturacak mahal ve odun ve kömür meccanen verilir veyahut bunlara mukabil maaş-ı muhassasının onda bir nisbetinde maaşlarına zam olunur.

( Kırk )