77

Kırk İkinci Madde Muallim muavinlerinin maaş senevîleri mahdud bulundukları muallim maaşının yüz altmış nisbetinde bi'l-hesab tahsis olunur

Kırk Üçüncü Madde Baş muallimin maaş-ı mahsusuna ekall bin kuruş zam ve ilave olunur

Kırk Dördüncü Madde Beş sene mütemadiyen ifa-yı hüsn-i hizmet eden muallimlerin ileride maaş-ı muhassasının onda biri nisbetinde mükâfata hakları olur bu mükâfat dahi ale't-tevâli yirmi sene tekmil-i hizmet edinceye kadar beher beş sene hizmetleri hitamında maaşlarının onda bir nisbetinde tezayüd eder

Kırk Beşinci Madde Muallimler kaza mekatib müfettişlerinin tertip ettikleri muallimin encümeninde ve maarif müdürü tarafından tertip olunan muallimliğe mensub derslerde hazır bulunmağa mecburdur

Kırk Altıncı Madde Muallimler memuriyetleri zamanında temettü vergisinden ve bi'l-cümle tekâlif-i belediyeden müstesnadır

Kırk Yedinci Madde Kaza mekteb müfettişinin reyi olmadıkça bir muallimin bir mektebden diğer mektebe nakl ve becayişi kat'an caiz olamaz

Kırk Sekizinci Madde Sunûf-ı mütekaddimeden olan bir muallimin yeri munhal olduğu halde yerine nasbı hakkı aşağı sınıfda bulunan muallimlerden en eskisine bi-hak intikal edecektir

Kırk Dokuzuncu Madde Esbab-ı mutebereye mebni ruhsat talep eden muallim üç güne kadar mekteb encümeni tarafından mezuniyet ita olunabilir bundan ziyade bir mâha kadar ruhsat kaza mekatib müfettişi tarafından verilir

Ellinci Madde Ruhsatı olmayarak mektebden infikak eden muallim müddet-i gaybûbeti içün maaş hakkından mahrum olur
Ruhsat alınmaksızın veyahut gaybûbetinin esbab-ı mücbiresini isbat etmeksizin bir aydan ziyade mektebden infikak eden muallimin ibtida-yı gaybûbetinden itibaren hizmetinden kaydı terkin ve yerine diğeri tayin olunur

Elli Birinci Madde Hastalık sebebiyle iki mâhden ziyade ifa-yı hizmete muktedir olamayan muallimin yerine muvakkaten diğeri geçirilip kesb-i sıhhat edinceye kadar maaşı nisbetinde tazminat tayin olunur