78

Elli İkinci Madde: Müddet-i tedrisiyenin inkizasından evvel hiç bir muallim derununda tedris etmekde olduğu mektebi terk edemez. Bir muallim esbab-ı muteberesi olmaksızın müddet-i tedrisiyenin inkizasından mukaddem mektebi terk edecek olur ise sene-i tedrisiyenin hitamına değin kalan müddet zarfında kendisine isabet eden maaşın iki misline muadil cezay-ı nakdi vermeye mecburdur ve bu makule muallim bir seneye kadar hiç diğer bir mektebe kabul olunmaz.

Elli Üçüncü Madde: İfa-yı vezaif etmeyen muallimler zirde gösterilen mücazat-ı intizamiyeye müstahak olurlar.
(1) İhtar
(2) Tevbih
(3) Elli guruşdan iki yüz guruşa kadar cezay-ı nakdi
(4) Mükafat-ı munzammesinin tenkîhi
(5) Daha aşağı sınıfa tenzil ve iadesi
(6) Müddet-i medîde veyâ kalîle zarfında muallimlik hizmetinden mahrumiyeti ile mücazat olunur.

Muallimlere vezaifine dair olunacak ihtar mahalli mekteb müfettişi marifetiyle mekteb encümeni tarafından ve tevbih ve cezay-ı nakdi ve mükafatın tenkîhi ve daha aşağı sınıfa tenzil ve iadesi mücazatı dahi kaza mekteb müfettişi canibinden icra kılınur. Bir muallim vezaif-i memuresinde tekasül ettiği veyâ adab-ı umumiyeye mugayir bir hareketde bulunduğu takdirde anın muallimlik sınıfından ihracı mücazatı maarif müdürünün talebi üzerine liva cinayet mahkemesi hükmüyle icra edilir.

Elli Dördüncü Madde: Mevad-ı sabıkada muallimler hakkında muharrer olan ahkâmın muallimeler hakkında dahi şumûlü vardır.

Elli Beşinci Madde: Temadiyen on iki sene muallimliğe hasr-ı nefs etmek şartiyle muallimler nizamname-i mahsusda gösterilen ahkame tevfikan hizmet-i askeriyeden muvakkaten muaf tutulurlar.

***

Dördüncü Fasıl

( Tedris-i mecburi ile şakirdanın mekatib-i ibtidaiyeye ale't-tevali )
( devamlarına dairdir )

Elli Altıncı Madde: Sene-i tedrisiye ibtidasında yedi yaşını ikmal etmiş veyahud tekmil etmeye yaklaşmış olan gerek zükûr ve gerek inas bi'l-cümle atfal veli ve vasilerinin...
(Taht)