85

İşbu beyannamenin virildiği tarihden itibaren otuz güne kadar Maarif Müdürü tarafından bir gûna itiraz ve ihtar vuku bulmaz ise ol hususi mekteb küşad edilebilür.

Toksan İkinci Madde
Balada zikri sebkat iden üç bendlere muvafakat itmeksizin her kim hususi mekteb küşad idersse beş yüz guruşdan bin guruşa kadar cezay-ı nakdi ahzıyla mücazat olunur ve mektebi kapatdırılır.

Toksan Üçüncü Madde
Çocuklarını bir hususi mektebe gönderen veliler ve vasiler mekatib-i umumiyenin idaresi içün lazım gelen masarifden hisselerine isabet iden mikdarı tesviye itmek mecburiyetinden muaf olamazlar.

Sekizinci Fasıl
( Muallim Mektebleri Hakkındadır )

Toksan Dördüncü Madde
Muallim mektebleri mekatib-i ibtidaiyeye ehliyetli muallim ve muallimeler yetişdirmeke mahsus bir nevi tesisatdır.

Toksan Beşinci Madde
Her cemaat-i mezhebiyenin kendi masarifiyle dilediği mahalde ve lazım geldiği adedde muallim mektebleri küşad ve idaresine salahiyeti vardır.

Toksan Altıncı Madde
Muallim ve muallimeler yetişdirmeke mahsus üç aded muallim mektebleri vilayet masarifiyle küşad ve idare olunacakdır. Muallim ve muallimelere muktazi ve malumat-ı lazimeyi havi olan mevad-ı ilmiye dersleri mekatib-i rüşdiyede dahi tedris olunabilür.

Toksan Yedinci Madde
Muallim mekteblerinin tesis ve idaresiyle programı ve dahili intizamı bir kanun-ı mahsus ile tayin edilecektir.

Kısım-ı Sani
( İdare-i Mekatib Hakkındadır )

Toksan Sekizinci Madde
Mekatib-i ibtidaiyenin idare-i dahiliyesi ve vezaif-i sairesi mahalli nahiye müdürleriyle belediye ve ihtiyar meclislerine muhavveldir. Bunlar dahi şu vezaifi mekteb encümenleri vasıtasıyla ifa ederler.

Toksan Dokuzuncu Madde
Bilcümle mekatib-i ibtidaiyenin başlıca nezareti Maarif Müdürü’ne aid olub mumaileyh dahi bunu kavanin ve nizamnameler mucibince mekteb müfettişleri vasıtasıyla icra eder.