115

Bin sekiz yüz seksen bir senesi muvazene-i maliye nizamnamesine zeyl olmak üzere bütçenin yüz sekseninci faslında gösterilen ihtiyat akçesinin sarfı muhtemel olan mahalleri mübeyyin olan defter-i masarifatdır.

Birincisi: Milis askerinin ikamet eylediği hane sahiblerine verilecek tazminat.

İkincisi: Me’kûlat ve kisvenin terakki-i fiyatı halinde piyade ve süvari askeri için vuku bulacak fazl-ı masarifat.

Üçüncüsü: Ecnebi memurları maaşlarına edilecek zamâim.

Dördüncüsü: Muhacirin-i İslamiyenin emlakinden hasıl olub vilayet mal sandığına varidat-ı meşruta namıyla el-yevm mevcud olan mebaliğin mezkûr sandık tarafından tahsil olunan ashab-ı akarın matlubatına adem-i kifayeti halinde ita olunacak tazminat.

Beşincisi: Me’kûlatın terakki-i fiyatından dolayı mahbusînin idaresi için bütçede gösterilmiş olan mebaliğin kifayet etmediği takdirde mebaliğ-i mezkûreye edilecek zamâim.

İrade-i seniye tarihi: fi 20 Rebiülahir sene 298

— — — — —

Nam-ı namî-i Hazret-i Padişahîye olarak nizamname-i dahilinin onuncu ve elli dördüncü maddeleri mucibince bin sekiz yüz seksen senesi Kanun-ı Evvelinin dokuzuncu günü Meclis-i Umumi-i Vilayetden kabul olunub lede’l-arz meriyeti hakkında irade-i seniye-i Hazret-i Padişahî müteallik ve şerefsudur buyurulan işbu Mesahat, Evzan ve Akyal Kanunnamesinin valisi bulunduğum Rum İli Şarkî Vilayetinde mer’iyyü’l-icra tutulmasını ilan eylerim.

( Mesahat ve Evzan ve Akyal Hakkında Kanun-ı Vilayetdir )

Birinci Madde: Mesahat ve evzan ve akyal için usul-i a’şarînin ittihaz ve istimali dahil-i vilayetde hükümat-ı mahalliye için bin sekiz yüz seksen üç senesi Martı ibtidasından itibaren mecburidir.

İkinci Madde: Mesahat ve evzan ve akyal için mikyasları ber-vech-i âtî beyan olunur.