131

Bir nâhiyede bulunan ashâb-ı emlâk üzerine emlâkın kıymet-i hakîkiyesinden ziyâde vergi tarh ve tevzî‘ edecek olurlar ise işbu hareketlerine mukâbil beher a‘zâ içün yüz guruş altun akçe cezâ-yı nakdî olmak üzere kûmîsyondan ahz ile tecrîm olunacakdır.

Sekizinci Mâdde: Verginiñ inkısâmı mu‘âmelesini teshîl etmek içün kadastro kânûnnâmesinin dokuzuncu mâddesi hükmünce kazâ tahsildârları ma‘rifetiyle cemâ‘ât meclisleri refâkatinde bulundurulacak olan muhamminler sancak kûmîsyonı tarafından nasb ve ta‘yîn olunacak ve işbu muhamminler şehrî yedi yüz guruş ma‘âşla tavzîf edilecektir.

Dokuzuncu Mâdde: İşbu nizâmnâme ahkâmının icrâsı umûr-ı nâfi‘a ve mâliye müdîrliklerine muhavveldir. İrâde-i seniyye târîhi fî 21 Muharrem sene 99 ve fî 1 Kânûn-ı Evvel sene 97.

***

Biñ sekiz yüz seksen senesi Kânûn-ı Evvelinin beşinci güni Rûm İli-i Şarkî Vilâyeti Meclis-i Umûmîsinden bi'l-kabûl mer‘iyeti hakkında irâde-i seniyye-i hazret-i pâdişâhî müte‘allik ve şeref-sudûr buyurulan tahrîr-i emlâk kânûnnâmesinin üçüncü mâddesinin ikinci fıkrasındaki sehvin ta‘dîl ve ıslâhı bi'l-icrâ tekrâr tasdîk-i ‘âliye arzı zımnında asıl ve sahîhi ber-vech-i zîr beyân olunur.

Üçüncü mâddeniñ ikinci fıkrası sûretidir

Fakat biñ sekiz yüz yetmiş altı senesi Eylülünün birinci gününden i‘tibâren biñ sekiz yüz yetmiş sekiz senesi Eylülünün birine kadar olan müddet dâhil olmayacakdır. Bir cemâ‘atiñ vâridâtını taharrî ve ta‘yîn içün kûmîsyon nâhiye müdîri veyâ mu‘âvinlerinden biri veyâhud ahâlî-i zürrâ‘ıñ eñ müreffehü'l-hâl olanlarından müntehab dört kişi celb edilecektir. A‘zâ-yı merkûme mümkin oldığı kadar mensûb oldukları cemâ‘atiñ mezrû‘ olan arâzîsinin hâsıl eyledikleri vâridâtı hakkında ma‘lûmât vîreceklerdir.

Fî 7 Safer sene 299

16