192

Saltanat-ı Seniye Şehbenderlerine Dâir Nizâmnâme-i Dâhilîdir

Birinci Kısım

Şehbenderhânelerin Sûret-i Teşekkülü

Birinci Fasıl

( Şehbender Mâmurları )

Birinci Bend: Heyet-i şehbenderî biri muvazzaf diğeri fahrî (bilâ-maâş) olmak üzere iki nevidir.

İkinci Bend: Muvazzaf şehbenderler üç sınıfa münkasimdir. Birincisi Baş Şehbender, ikincisi Şehbender, üçüncüsü Şehbender Vekili veyâhud Kançılarya Mâmurudur.

Üçüncü Bend: Muvazzaf ve fahrî şehbenderlerin kâffesi bi-irâde-i şâhâne nasb ve tâyin olunur.
Muvazzaf şehbenderlerin tebaa-i Devlet-i Aliyye’den bulunmaları ve ticâretle meşgûl olmamaları meşrûttur.

Dördüncü Bend: Muvazzaf şehbenderlere mikdâr-ı muayyen maâş ve mahal-i mâmuriyetlerinin ehemmiyetine göre münâsib mikdâr (Alokasyon) tahsîsât itâ olunacaktır.

Beşinci Bend: Şehbenderlerin maâşları ber-vech-i zîr tâyin olunur.
Baş Şehbendere üç bin, Şehbendere iki bin, Şehbender Vekiline veyâhud Kançılarya Mâmuruna bin kuruş tahsîs olunmuştur.
Şehbenderlerin maâşları mahal-i mâmuriyetlerine vusûlleri târîhinden îtibâren mâh-be-mâh te’diye edilir.

Şehbenderliğe tâyin olunan mâmur mahal-i mâmuriyetine gitmek emrini aldığı günden îtibâren iki haftaya kadar Dersaâdet’ten hareketle doğruca mahal-i mâmuriyetine gitmeğe mecbûr olub aksi takdîrde on yedinci bendde gösterilen cezâya dûçâr olacaktır.

Altıncı Bend: Her şehbenderhânenin ve ba’zı kançılarya mâmurlarının tahsîsât-ı seneviyeleri yirmi dokuzuncu bendde muharrer tâlimâta melfûf (1) işâretiyle mürakkam cetvel-i mahsûsunda gösterilecektir.

(İşbu)