199

Kırk üçüncü bend: Muvazzaf veyâ fahrî şehbenderler isti‘mâl etdikleri pulların hesâbını her üç ayda Hâriciye Nezâreti’ne irsâl eyleyecekler ve isti‘mâl olunmayan pulları her altı ayda nezâret-i müşârün-ileyhâya iâde edeceklerdir. Taraf-ı nezâretden dahi yeniden pul gönderilecektir.

Kırk dördüncü bend: Şehbenderler verdikleri pasaport ve tasdîknâme ve sâir evrâk-ı matbûa Hâriciye Nezâreti cânibinden irsâl olunacaktır.

Kırk beşinci bend: Mer‘iyyü’l-icrâ olan ta‘rife ber-vech-i âtî ta‘dîl olunmuşdur.
Pasaport resmi 50 kuruş
Vize resmi 20 "
Elli tonilâtodan dûn olan sıhhiye patentasının vize resmi 10
Elli tonilâtodan ziyâde sıhhiye patentasının vize resmi 20
Rusûm-ı sâirenin kâffesine yüzde on zam olunmuşdur.

Kırk altıncı bend: Ta‘rife i‘lânı her şehbenderhânenin kapılarına seng dîvârına ta‘lîk olunacaktır.

Kırk yedinci bend: Kapılarında bulunan me’mûr tarafından ta‘rifeden fazla resim ahz edilmemesine şehbenderler dikkat edecekler ve ta‘rifede musarrah olmayan evrâk-ı resmiye meccanen verilip derhâl Hâriciye Nezâreti’ne ihbâr-ı keyfiyet eyleyeceklerdir.

Kırk sekizinci bend: Zabtnâme ve sâire gibi şehbenderlerin tanzîm edecekleri varaka-i resmiye her satırı on iki hecâdan ve her sahîfesi yirmi beş satırdan ibâret olmak üzere iki sahîfe i‘tibâr olunmuşdur. İki sahîfe hitâmında bed’ olunan dîger varaka içün tam resim ahz olunur. Türkçe tanzîm olunan varaka yirmi satır olmak üzere bir sahîfe i‘tibâr olunur.

Kırk dokuzuncu bend: Husûs (vakasiyon) müddeti üç sâatdir. Müddet-i muayyeneden evvel hitâm bulan husûs içün tam resim ahz olunur.

Ellinci bend: Husûs esnâsında tanzîm olunan zabtnâme müsveddeleri içün bir gûne resim ahz olunmayacaktır.

Elli birinci bend: İstinsâh etdirilen evrâk-ı resmiyenin her biri içün sûret harcı istîfâ olunur.