253

Yüz elli birinci madde: Lonca cemiyeti bazı manastırların düçar oldukları düyunatın suret-i tesviyesi meselesini nazar-ı ehemmiyete alarak bilâ-imhal buna bir çare araması lazım gelip bu babda münasip göreceği tedabir ve mütalaatını icabının icrası zımnında Patrikhaneye beyan ve ifade etmesi iktiza eder.

Yüz elli ikinci madde: İşbu nizamnamenin mevki-i icraye vaz'ından itibaren Lonca cemiyetinin ilk vuku bulacak içtimaında ve ileride dahi beher beş senede bir kere olarak yedinci maddenin ahkamına tevfikan her manastır ve keşişhanede bulunacak keşişlerin miktarını tayin etmeye mecburdur.

Yüz elli üçüncü madde: Manastırlarda bulunan papas ve keşişler bir tarafa gittikçe ale'l-usul mürur tezkereleri aldıkları misillü ba'dezin avdetlerinde dahi hükümet-i mahalliyeye isbat-ı vücud ile manastır gumenosuna veyahut mütevellilerine hitaben tezkere almadıkça kabul olunmayacaktır.

***

Hatime

İşbu nizamname ahkamı Aynoroz manastırlarıyla müştemilatının usul-i idare-i dahiliyelerine dair olduğundan hükümet-i mahalliyenin umur-ı mülkiye ve hukukiye ve zabtıyeye müteallik vezaif ve muamelatı kavanin ve nizamat-ı mevzua ve talimat ve evamir-i mahsusa dairesinde bilâ-hadd cereyan edecektir.

Fi 20 Zilhicce sene 94

***

Bimarhanelere Dair Nizamnamedir

Birinci madde: Hangi milletten olur ise olsun bir kimse hükümet-i seniyyeden ruhsat-ı resmiye almadıkça bimarhane te'sis edemeyecektir ve ruhsat-ı resmiye alınmayarak küşad olunmuş olan bimarhaneler ruhsat-ı resmiye istihsaline mecbur olacaktır. Dersaadet ve memalik-i mahrusa-i şahanenin sair taraflarında bimarhane te'sis ruhsat-ı resmiyesi mekteb-i tıbbiye nezareti tarafından verilecektir.

İkinci madde: Hanelerde bir mecnun zuhur edip familyası bağlamaya mecbur olduğu halde bağlanıp akiben hükümete ihbar ile kaide-i mevzuasına tatbikan muayene...