28
Dahiliye
Salisen – Bilcümle eşyâ-yı ticâriye nümûnesi
Râbian – Vezni iki kilogramı tecâvüz etmeyen kütüb-i mütenevvia ile her dürlü harita ve resim ve evrak-ı matbûa ve gayr-i matbûa paketleri

Beşinci madde – Zarf içinde olmayarak postahânelere vürûd eden evrak ve eşyâ paketleri miyânında ücreti mütefâvit olan ve inhisâra dokunan evrak ve eşyâ bulunup bulunmadığını ve bir taraflarında mektup makâmına kâim olur muhâbereye müteallik kelimât muharrer olup olmadığını anlamak içün posta memurlarının ol paketleri muâyeneye salâhiyetleri olacak ve gazetelerin üzerine mürselünileyhin isim ve şöhret ve mahal-i ikâmetinden mâadâ hiç bir şey yazılmayacak ve şâyet yazıldığı halde mektup add ve îtibâr edilip ana göre resm-i istifâ kılınacaktır

Altıncı madde – Rüsûmât memurları tarafından esnâ-yı muâyenede eşyâ içinde inhisâra dokunur mektup ve sâire zuhûr eder ise sâhibi hakkında sekizinci maddede gösterilen muâmele icrâ olunacaktır

Yedinci madde – Bil-taharri tutulacak kaçak mektup ve sâirenin büyük posta memûruna teslîm olunup iki kat ücret alınacak ve bu ücretin nısfı kaçağı tutanlara ve diğeri dahi ashâbının yüzü önünde mektuplara pul yapıştırılarak iptâl edilecektir. Usûlü veçhile posta idâresine ücreti verilmiş ya’ni evvelâ üzerine îcâb eden pullar yapıştırılmış ve sâniyen mektubu gönderen posta merkezi mührü basılmış ve sâlisen postahânenin her dürlü mesûliyetten kurtulduğunu müş’ir gayr-i mesûl ibâresi yazılmış olan mektupların âhâd-ı nâs tarafından nakl ve imrârına memnûniyet olunmayacaktır

Sekizinci madde – Mektup nakli ticâretini îtiyâd ile postanın inhisâr usûlüne sekte verir harekette bulunanlardan tutulan mekâtib ve evrâkın iki kat posta ücreti ahz olunduktan başka bir Osmanlı lirasından beş Osmanlı lirasına kadar cezây-ı nakdî alınacak ve mükerrerlerinden işbu cezây-ı nakdî iki kat olarak ahz olunacaktır

( İkinci fasıl )