54

Dahiliye

Râbian [ Sıfatı ki ] ulemâ ve hukemâ ve sâireden olduğunu ve rütbe-i mülkiye ve askeriye ve ilmiyeyi hâiz olup olmadığını beyan eder.

[ Eşkâl-i mahsûsa ve alâmât-ı fârika ] hânesinde yalnız nüfûs-ı mezkûre mahsûs olmak üzere mürûr-ı zamanla zâil olmayan gözlerin ve sîmânın levni ile sinni yirmiyi mütecâviz olanların boyları gösterileceği gibi göz bereliği ağız çarpıklığı yüzde çiçek bozukluğu ve büyük çıban yeri ve çolaklık ve topallık ve göğüs ve sırt kamburluğu misillü alâmât dahi derc ve tasrîh edilir.

[ Târîh-i velâdet ] ki doğduğu günü yazmağa mahsûsdur.

[ Maskat-ı re's ] ki tevellüd eylediği memleket beyan olunur.

[ Sınıf-ı askerîsi ] ki beher şahsın esnân ve nizâmiye ve ihtiyat ve redif ve müstahfız sınıflarından kangısında bulunduğu yazılır. İzdivâc ve ilel-i zâhire ve ahvâl-i sâire melhûzâtda gösterilir.

[ Vukûât ] sırasında ba'de't-tahrîr zuhûr edecek tahavvülât yazılır. Meselâ bulunduğu mahalle ve karyeden dîger mahalle veyâ karyeye felân târîhde nakl-i hâne etdiği veyâhud esnânda iken kur'a isâbetiyle nizâmiyeye ve nizâmiyeden ihtiyâta veyâ redîfe ve redîfden müstahfıza kezâlik felân târîhde nakl eylediği ve bunların emsâli gösterilir. Ancak işbu umûm vukûât hânesinin zîrinde gösterilen cild ve sahîfe ve husûsî nûmeroları ki asıl vukûât içün tutulacak defterlerin cild ve sahîfe ve nüfûsa mahsûs husûsî nûmerolarından ibâret olduğundan hîn-i vukûâtda ana göre terkîm edilir.

İhtârât-ı Mahsûsa

Bir kazânın sicill-i nüfûsu kaç kıt'aya bâliğ olur ise fihrist mahallinin bâlâsına ve her bir cildi üzerine birincisi ve ikincisi i'tibâriyle işâret olunacakdır.

İşbu sicillin beher kıt'ası yetmiş beş tabakadan mürekkeb olarak teclîd etdirilecekdir.

( Mersûl )