66
Dahiliye

Sâniyen altıncı maddede gösterildiği üzere bir sene zarfında üç kere mensub olduğu
nezaret ve idarenin nizamname-i dahilisi mucibince muamele-i cezaiye görmüş olur ise
sâlisen bir memurun bulunduğu memuriyet ilga olunur ise veyahut o memuriyeti icra
etmek için tayin olunduğu müddet mürur eder veyahut istifa edip de istifası
kabul olunur ise râbian devletçe bir sebeb-i zaruri görülür ise hâmisen
bir cünhadan dolayı hapis veya nefyine hükm olunur ise sâdisen ifa-yı vazifede
iktidarsızlığı kat’iyen tahakkuk eder ise memuriyetinden azl edilir. İrade-i Seniye ile
mensub olmayan memurları nuzzar ve vülât kaidesine tatbikan azle me’zun olup İrade-i
Seniye ile mensub olan memurinden icab edenlerin azli mensub olduğu makamlara
inha ve oradan makam-ı celil-i vekâlete arz ile İrade-i Seniye istihsaline mütevakkıftır. Sebeb-i
zarurinin tayini Meclis-i Vükelâ’ya aittir.

On yedinci madde: Ba-İrade-i Seniye mensub olup memuriyeti ilga olunan ve istifa
edenlerden hüsn-i hareket ve istikamet sahibi olduğu ve devletçe hiç bir vakit
lekelenmemiş idüğü sicill-i ahlakının mütalaasıyla Meclis-i Vükelâ’ca tahakkuk eden
ve devletçe bir sebeb-i zaruri üzerine azl edilen memurine infisal eylediği
memuriyette aldığı maaşın rub’u mikdarı hazine-i devletten ma’zuliyet maaşı verilir.
Fakat işbu ma’zuliyet maaşının nihayet derecesi yedi bin beş yüz kuruştur. Yani
bir memurun infisal eylediği memuriyet maaşının rub’u yedi bin beş yüz kuruşu
tecavüz etse bile yine yedi bin beş yüz kuruş verilecektir.
Makam-ı vekâleti ihraz eden zevat-ı fihamın ma’zuliyet maaşı nihayet derecede verilen
ma’zuliyet maaşının iki ve mesned-i meşihatı ihraz eden zevatın ma’zuliyet maaşı bir buçuk
misli olacaktır.

* Beşinci Fasıl *

( Memurînin cürmü vukuunda icrası lazım gelen muamelat )

On sekizinci madde: Nezaret ve devairde ve vilayatta bulunan küçük ve büyük bilcümle
memurîn-i devlet hakkında memuriyetlerinden dolayı dava vuku bulduğu halde Memurîn
Muhakemesi Nizamnamesine ve Vilayet Kanunu ahkâmına tevfîk-i muamele olunur.

( İkinci Bab )