102

Adliye

Sû-i ahlâk ve şöhret ashâbından olduklarına dâir hâsıl olan şüpheye mebnî encümen-i intihâb anları red edebilir.

Beşinci Madde: Mekâtib-i hukukiyeden şehâdetnâmesi olmayıb da birinci maddede gösterildiği vechle mehâkimde istihdâm olunmuş olan zevât me’lûf oldukları işlerin mâadâsına intihâb olunmazlar. Meselâ ticâret mahkemesi reîsi veyâhud a‘zâsı hukuk veyâ cezâ dâirelerine intihâb olunmazlar.

Altıncı Madde: Evsâf-ı muharrereyi hâiz olmak ile berâber sû-i ahvâlinden dolayı me’mûriyetinden azl olunmuş olan zât sebeb-i azlini bir sened-i resmî ile cerh etmedikçe ve buna encümence yakîn hâsıl olmadıkça tekrâr adliye me’mûriyetine intihâb olunamaz.

Yedinci Madde: Taşra encümenlerinden intihâb olunmuş olan zevâtın derece-i ma‘lûmâtı encümence ta‘yîn eder. Ancak hüsn-i hâlleri ile ve intihâb olundukları işlerin derecâtıyla mütenâsib imtiyâzı hâiz oldukları vülât tarafından tasdîk olunacaktır. Ma‘rûf ve mücerreb olan zevât hakkında işbu tasdîk aranılmayacaktır.

Sekizinci Madde: Bir zâtın intihâbını tavsiye eden encümen a‘zâsından zâtın ismiyle vukûbûlan tavsiyesi encümen mazbatasına derc olunacaktır.

Dokuzuncu Madde: Emr-i intihâb encümen a‘zâsının ekseriyet arasına muallak olub üç muhâlif re’y hâsıl olur ise intihâb makbûl olmaz.

Onuncu Madde: Encümen a‘zâsının ârâsı hafîdir.

On Birinci Madde: Encümen mazbatasında a‘zânın imzâsı vaz‘ olunur.

İrâde-i Seniyye târîhi fî 7 Rebîülâhır sene 300 ve fî 3 Şubât sene 298

( Resm-i Tamga )