134

Ticaret

Dokuzuncu Madde: Ziraat odaları ziraate aid olan hususatda ibraz-ı âsâr-ı terakkiyat edenler haklarında olunacak mükâfatı hükûmet-i seniyyenin nazar-ı âtıfetine arz eder.

Onuncu Madde: Her ziraat odasına mahsus olarak üzerinde ziraat odası ibaresiyle vilayet veyahut sancak ve kazanın ismi mahkûk birer mühür olup verilen kararlara tevfikan kaleme alınan tezakir ve muharrerat ve evrak-ı saire işbu mühür ile temhir kılınır.

On birinci Madde: Reis bulunan zât odaya havale olunan bilcümle muharrerat ve evrak-ı saireyi nazar-ı tetkikden geçirdikden ve rûzname-i müzakereye kayd etdirildikden sonra mevki-i müzakereye vaz‘ eder. Mevki-i bahs ve müzakereye konulan mevad ekseriyet-i ârâ ile hall olunur ve tesâvi-i ârâ vukuunda reisin bulunduğu tarafa itibar edilir.

On ikinci Madde: Mevzu-ı bahs ve müzakere olan meseleye a‘zânın nısfı hazır olmadıkça karar-ı kat‘î verilmeyip ertesi içtimaa ta‘lik kılınır.

On üçüncü Madde: Ziraat odalarına irsal olunan tezakir ve muharrerat ve evrak-ı saire reis hazır olmadığı halde reis-i sâni tarafından açılır ve verilen kararlara tevfikan kaleme alınan tezakir ve evrak-ı saire müsveddeleri dahi imza olunur.

On dördüncü Madde: Her ziraat odasının üç kıt‘a defteri olup birine zabt ceridesi olmak üzere heyetin gerek muvafık ve gerek muhalif olan reyleri tahrir olunup reis ve hazır bulunan a‘zâ tarafından imza olunur diğerlerine dahi odanın kâffe-i evrakı kayd olunur.

On beşinci Madde: Ziraat odaları heyet-i tahririyesi odalar tarafından intihab ve tayin olunur.

On altıncı Madde: Odaların heyet-i tahririyesi verilen kararları zabt ve tahrire ve kâffe-i evrakı tanzim ve muhafazaya memur mes'uldür.

On yedinci Madde: A‘zâr-ı makbuleye binâen kâtib-i evvelin gıyabı esnasında kâtib-i sâni veyahut a‘zâdan biri baş kitabet vezâifini muvakkaten ifa eder.

On sekizinci Madde: Ticaret ve Ziraat Nezâreti işbu nizamnamenin icrasına memurdur.

İrade-i seniyye tarihi fî 8 Rebîü'l-âhir sene 1300 ve fî 4 Şubat sene 1298
(Dersaadet)