149 Temur yol ve sâir inşâât şartnâmesi

Mahsûsada umûr-ı nakliyeye mahsûs olmayan sâir eşyâ-yı gayr-ı menkûleyi hüsn-i hâlde olarak bilâ-bedel devlete devir ve teslîm edecektir. Makine ve lokomotif ve vagon ve araba ve âlât-ı inşâiye ve ta'mîriye ve mahrûkât ve her nev'i levâzımât gibi hattın işletilmesi içün lâzım gelen eşyâ-yı menkûleye gelince hükûmet-i seniye bunları muhamminlerin takdîr edecekleri bedel mukābilinde mübâyaa edecektir. Şu kadar ki devletin mübâyaa edeceği levâzımât temur yolun altı ay işletilmesi içün muktazî olan mikdârı mütecâviz olmayacaktır.

Müddet-i imtiyâziyenin hitâmından beş sene evvel temur yolun hüsn-i hâlde olmadığı ind'et-teftîş devletçe anlaşılırsa sâhib-i imtiyâza bir müddet ta'yîniyle ihtâr-ı keyfiyet edilecek ve bu ihtârın semeresi görülmez ise hükûmet derhâl temur yolu ve müteferriâtını yed-i idâresine alarak ashâb-ı imtiyâz hesâbına olarak ta'mîrât-ı lâzımeyi icrâ ile yolu hüsn-i hâle vaz' etmeğe salâhiyeti olacak ve hâsılâtdan işletme ve ta'mîrât masârifi çıkarıldıktan sonra fazlası sâhib-i imtiyâza itâ olunacak ve noksan zuhûr eder ise ikmâl ettirilecektir.

***

Dördüncü Fasl

( Yolcu ve emtiadan alınacak ücûrât ile şerâit )
( Müteferriası beyânındadır )

Yirmi birinci madde — Mukāvelenâmenin . . . maddesi mûcibince sâhib-i imtiyâzın istîfâ etmeğe me'zûn bulunduğu ücûrât-ı nakliye ta'rifesi ber-vech-i âtî beyân olunur.

Âti'z-zikr ta'rifeler nihâyet derece olup bunlar taraf-ı devletten ruhsat-ı mahsûsa istihsâl olunmadıkça tezyîd edilemeyecektir. Fakat ta'rifelerde ta'yîn kılınan nihâyet mikdârlar tenzîl olunduktan sonra bir mâh evvel i'lânât-ı mahsûsa vâsıtasıyla halka ihbâr edilmedikçe tekrâr nihâyet derecelere terfî' edilemeyecek ve ancak ta'rifelerin tenzîli hâlinde üç gün evvel i'lân olunacaktır.