174

Girit Vilayeti

Fasl-ı Sani

( Maarif Heyetlerinin Vezaifi )

Yirmi Altıncı Madde: Her sene livalarda bi’l-intihab tayin edilecek maarif meclis heyeti heyet-i sabıkanın makbuzat ve masrafiyatı muhasebesini rüyet ve ahz edecektir.

Yirmi Yedinci Madde: Maarif heyetleri haftada bir ve icabına göre iki gün içtima edecek ve her içtima la-akal üç saat imtidad eyleyecektir.

Yirmi Sekizinci Madde: Maarif heyetleri mekatib-i mevcudenin hüsn-ü idaresine ve icab eden yerlerde müceddeden mektebler tedarik ve tesisine ve usul-i cedide üzere tahsil-i ibtidainin vesail-i teshiliyesine ve muktedir ve afif muallimler intihabına ve varidat-ı maarifin vakt ü zamanıyla tahsil ve su-i istimalat ve israfdan muhafazasına ve tahsil-i cebrinin her yerde bila-istisna ilerletilmesine memurdurlar.

Yirmi Dokuzuncu Madde: Şehirlerde mekatib-i ibtidaiyenin daire-i vahideye birleştirilmesi maarif meclislerinin cümle-i vezaifindendir. Fakat Kandiye şehrinin mekatib-i ibtidaiyesi nihayet altı daireye kadar taksim olunabilecektir.

Otuzuncu Madde: Evkaf-ı sahihadan olmayan mekteblerden usul-i cedideye tebaiyet etmeyen ve lüzumsuz görülenleri lağv ve sedd olunacaktır.

Otuz Birinci Madde: Velileri olmayan ve serseri gezen çocukları cebren mektebe almağa ve bunlardan kabiliyetsiz olanları islahhaneye göndermeğe veyahut sanata koymağa maarif meclisleri mecbur olacaklardır.

Otuz İkinci Madde: Umum mekatib için iktiza eden kütüb ve resail ve sair alat-ı ilmiyenin tedariki ve bunların hüsn-ü masraf ve muhafazası maarif mecalis ve şubelerine aiddir.

Fasl-ı Salis

( Mekatib-i İslamiyenin Derecatı )

Otuz Üçüncü Madde: İcab eden karyelerde birer mekteb-i ibtidai ve iktizasına göre kazalar merkezlerinde birer rüşdiye mektebi bulundurulacaktır.

( Otuz )