180

( Girit Vilayeti )

Yetmiş altıncı madde: İmtihanlar ulema ve erbab-ı maariften mürekkep mahsus komisyonlar marifetiyle maarif meclislerinin taht-ı nezaretinde icra olunacaktır.

Yetmiş yedinci madde: İmtihan komisyonları mümeyyizleri meclis-i maarifin ekseriyet-i ârâsıyla intihab ve davet edilecektir.

Yetmiş sekizinci madde: İmtihanlar Maarif Nizamname-i Umumisi ahkamına tevfikan icra olunacaktır.

Yetmiş dokuzuncu madde: İmtihanda isbat-ı liyakat etmeyen talebe sınıfça terakki edemeyip bulundukları sınıfta ibka edilecektir.

Sekseninci madde: Maarif sandıklarına aid olmak üzere rüşdiye şehadetnamesini alan talebeden iki ve idadiye şehadetnamesini ihraz edenlerden dört ve sultani mektebinden ruus alanlardan altı sim mecidiye ahz ve istihsal edilecektir. Şu kadar var ki ashab-ı zaruretten olan maarif meclislerinin kararlarıyla şehadetname ve ruus ücretinden muaf olabileceklerdir.

( Mevadd-ı Şetta )

Seksen birinci madde: Kanun-ı Esasi mucibince tedris ve tederrüs hür ve serbesttir. Her kim olur ise olsun bilâ-mümanaat mekteb küşad edebilir. Ancak mekatib-i hususiye muallimin ve müdirleri behemehal maarif nizamatına tabi ve madde-i âtiyede mübeyyen kavaid-i mahsusa ile mükellef olacaklardır.

Seksen ikinci madde: Hariçte mekteb küşad edecek olanlar evvel be-evvel Liva Maarif Meclisinden istihsal-i ruhsata mecbur olacaklardır.

Seksen üçüncü madde: Hariçte mekteb küşadı için iltimas-ı ruhsat edenler Elviye Maarif Meclisleri huzurunda imtihanları bil-icra muallimlik vazifesini ifaya muktedir oldukları ve muallimliğe layık evsaf-ı makbule ile muttasif ve mütehallik bulundukları tahakkuk eder ise ruhsat-ı matlube tahrîren ita ve aksi takdirde red ile cevab verilecektir.

Seksen dördüncü madde: Hususi mektebler Maarif Meclislerinin nezaret-i mütemadiyesi altında bulunacaklar ve muallimin ve müdirleri mecalis-i mezkûrenin kararlarına tevfîk-i hareket ve muameleye mecbur olacaklardır.

( Seksen )