56

Fasl-ı Sâlis
( Asâkir-i Zabtiye )

Elli üçüncü madde — Asâkir-i zabtiye ümerâ ve zâbitânının maaşât ve muayyenâtı işbu kanuna merbut cetvel ile tayin olunmuştur.

Elli dördüncü madde — Asâkir-i nizamiye ümerâ ve zâbitânından zabtiye zâbitliğinde istihdam olunanlar zabtiye zâbitliği maaşını alıp rütbe-i askeriyeleri için maaş ve tayin alamazlar.

Bâb-ı Râbi
( Maaşât-ı Zâtiye )

Birinci Fasıl
( Mütekâidîn-i Kadîme-i Mülkiye )

Elli beşinci madde — Mütekâidîn-i kadîme-i mülkiye için muhassas olan maaşların humsu bi’t-tenzil maadası kararname-i mahsusasına tevfikan mahlûlâtı dahi oraya aid olmak üzere tekaüd idaresine nakl olunmuştur. Fakat bu maaşların komisyonu marifetiyle bi’t-tedkik kat’ ve tenzili lazım gelen mikdarı hazineye iade olunacaktır.

İkinci Fasıl
( Mazulîn )

Elli altıncı madde — Mazulîn maaşâtının humsu bi’t-tenzil maadası derece-i ihtiyaçlarına göre mazulîn-i mevcudeye tensikan tahsis olunacak ve mahlûlâtı bundan böyle kanunen mazulîne tahsisi lazım gelen maaşlara karşılık ittihaz edilecektir.

Üçüncü Fasıl
( Çıraklık )

Elli yedinci madde — Çıraklık maaşâtının humsu bi’t-tenzil maadasının mahlûlâtından bir rub’u hazine-mânde edilerek kusuru ba’dezin ihsan buyurulacak çıraklık maaşlarına karşılık ittihaz olunacaktır.

Dördüncü Fasıl
( Muhtâcîn )

Elli sekizinci madde — Muhtâcîn maaşâtının humsu tenzil ve komisyonu marifetiyle icra olunacak tedkikatta gayr-i müstahakkîne verildiği tebeyyün eden maaşlar hazine hesabına kat’...