300
Rum İli Şarkî

muharrer olan suret vechile tesviye-i deyn etmeğe mecburdur. Bu halde sandığa verilmiş deyn ve rehin senetleri var ise kendisine red edilir.

Otuz yedinci madde: Ziraat sandıklarına ait olan istida ve şahadetname ve kefaletname ve senedat ve buna mümasil sair bilcümle evrak varaka-i sahiha resminden müstesnadır.

* Yedinci Fasıl *

( Avam ve eşhas taraflarından ziraat sandıklarına güzeşte ile verilecek )
( mebaliğ hakkında akd olunacak mukavelat beyanındadır )

Otuz sekizinci madde: Avam ve eşhas taraflarından ziraat sandıklarına teslim olunacak mebaliğin miktarı yirmi beş bin kuruştan mütecaviz değil ise bunun re’sü’l-malı ve faizi be-her sene şehr-i Eylülde tesviye ve ifa olunur. Şayet miktar-ı mezkûru tecavüz eder ise o halde tamamının tesviye ve itmamına değin be-her sene miktar-ı muayyen akçe tesviye kılınır. Ma-mafih mukrizler tarafından talep vuku bulur da sandığın vüs'ati dahi bulunur ise senevi miktar-ı mukarrerinden daha ziyade ita edilir.

* Sekizinci Fasıl *

( Ziraat sandıklarına deyni olup da tesviye etmeyenler haklarında olunacak muamele )
( beyanındadır )

Otuz dokuzuncu madde: Ziraat sandıklarına deyni olan kesanın vadesi hitamında gelip tesviye-i zimmet etmeyenler sandık idaresi marifetiyle ve mahalli kaza kaymakamlığı vasıtasıyla davet ve celb edilerek tesviye-i zimmet etmemeleri her ne sebebe mebni olur ise olsun taht-ı rehniyetde bulunan emval ve eşyası ait olduğu mahkeme marifetiyle satılarak hasıl olacak esmandan zimmet-i vakıayı tesviyeye kifayet edecek miktarı alınıp deyni kapatdırılır. Bu babda kefalet edenler dahi zamin oldukları ( akçeyi )