(203)

Ziraat sandıkları muamelâtına dair kanun

Kuyûd-ı hesabiyeyi kapadıktan sonra geçen bir sene zarfında sandıklarca devr edilen kâffe-i muamelât-ı hesabiyeyi mübeyyin bir muhasebe cetveli tanzim ederler.

Kırk sekizinci madde: Tanzim olunacak bir senelik muhasebe cetvelinde sandığın mevcûd-ı hakikisiyle terâküm eden güzeştenin ve masârifât-ı vâkıa ile sandığın mikdâr-ı matlûbâtı başka başka tavzîhan gösterilecek ve muhteviyatı sandıkların defâtir-i mevcûdesi kuyûdâtına mutâbakat edecektir.

Kırk dokuzuncu madde: İşbu bir senelik muhasebe cetveli sancak komisyonlarına verilip oraca da tedkikât-ı lâzımesi ifa kılındıktan sonra iktiza eden raportu ale’t-tayin zaman içinde teşekkül edecek mecâlis-i kebîre-i elviyeye takdim kılınacaktır.

Ellinci madde: Zikrolunan muhasebe cedâvil-i seneviyesi sancak komisyonlarınca tasdik olunduktan sonra bir sureti Nâfia ve Ticaret ve Ziraat Müdiriyetine gönderilir.

On Birinci Fasıl

( Ziraat sandıklarının usûl-i teftîşiyesi beyanındadır )

Elli birinci madde: Sancak komisyonları her vakit isterler ise ziraat sandıkları muamelâtını teftiş ve tefahhus ile hesablarını tedkik ederler ma-mâfîh cânib-i komisyondan tayin olunacak bir aza marifetiyle hiç olmaz ise senede iki defa olsun icrâ-yı tedkikât ettirilir.

On İkinci Fasıl

( Müntehâ-yı ahkâm beyanındadır )

Elli ikinci madde: Ziraat sandıklarının müddet-i devamı ve zaman-ı ilgâsı mahdûd olmayıp yalnız bir vilâyet kanunnâmesiyle devamı kat’ ve ref’ edilir ve işbu kanunnâmede anların netice-i rûyeti muhasebeleri dahi derc ve tezkîr olunur.

Elli üçüncü madde: Ferâğ-ı bi’l-vefâ hakkındaki kanunnâme vilâyetin vaz’ ve tesisine kadar