(213)

İdare-i Sıhhiye Kanunu

Tasian
Hastahaneler ve mektebler ve meclisler ve kaplıca hamamları ve ziyade halk tecemmü eden sair bilcümle haneler ve mahallerde sıhhat-i umumiyeye sekte iras edebilecek esbabın men ve define dikkat ve nezaret eyler.

Beşinci Madde
Sıhhiye meclisi re'y ve kararlarını ekseriyet-i ara ile ita ve beyan eder. Tesaviyen ihtilaf-ı ara vukuunda reisin re'yi tağallüb eder. Ekliyetin re'yi başkaca tasrih kılınır.

Altıncı Madde
Sıhhiye meclisinin reis ve azası dahiliye müdüriyetinin teklifi üzerine vali tarafından nasb ve tayin olunur.

Üçüncü Fasıl

( Kaza tabib ve cerrahlarına dairdir )

Yedinci Madde
Her bir kazada bir tabib ve bir veyahut ziyade cerrah bulunur.

Sekizinci Madde
İktiza-yı halde dahiliye müdürü sıhhiye meclisiyle bi'l-ittifak livalarda mevcud olan kazaların taksimat-ı sıhhiyesini tezyid edebilir.

Dokuzuncu Madde
Kaza hekimleri sıhhiye meclisinin inzimam-ı re'yiyle dahiliye müdüriyetinin teklifi üzerine vali tarafından nasb ve tayin olunur.

Onuncu Madde
Kaza cerrahları meclis-i mezkurun teklifi üzerine dahiliye müdüriyeti canibinden tayin kılınır.

On Birinci Madde
Cerrahlar doğrudan doğruya kaza hekimlerinin taht-ı nezaretlerinde olarak icra-yı sanat ederler.

On İkinci Madde
Kaza tabibleri sıhhiye meclisinden ahz etmekde oldukları evamir ve talimatı icra ile bulundukları kazaların ahval-i sıhhiyesini mutazammın üç ayda bir kere layiha tanzim edip taakub eden diğer üç ayın nihayet ilk on beşinci gününe kadar irsal ve takdim ederler. İşbu layihaya merbut bir de kazalar dahilinde mezkur üç ay zarfında tevellüd eden adamların ve emraz-ı sariyeye mübtela olan hastalar ile vefat eyleyenlerin istatistik cetveli gönderilir.