217

İdare-i Sıhhiye Kanunu

Altıncı Fasıl

( Müstakillen icra-yı san'at eden hekimlere dairdir )

Otuz birinci madde — Her tabib ve cerrah işbu kanunun dördüncü maddesinin birinci fıkrasında beyan olunan şeraiti ifa etdiği halde dahil-i vilayette icra-yı san'at edebilir.

Otuz ikinci madde — Memur ve müstahdem olan tabibler gaib veyahut hasta oldukları veyahut bir illet-i sariye vuku bulduğu halde gerek İdare-i Sıhhiyenin ve gerek Hükümet-i Mahalliyenin emr ve tensibiyle müstakillen işleyen hekimler bir memuriyet-i muayyene-i sıhhiyenin muvakkaten icrasına mecbur olup fakat işbu memuriyet-i muvakkateye mukabil kendilerine kaza tabibliği ise vilayet sandığından ve belediye hekimliği ise belediyeden akçe olarak muayyen mikdar bir mükâfat verilir.

Otuz üçüncü madde — Bir kimse işbu kanun mucibince diploma ve sair senedat-ı mutebere-i tıbbiyeyi hamil olmaksızın ve şerait-i lazimeyi ifa etmeksizin dahil-i vilayette icra-yı tababet eder ise on liradan otuz liraya kadar ceza-yı nakdi ifasına mecburdur. Tekerrür-i töhmetde ceza-yı nakdi-i mezkûru iki kat ifa etmekle beraber on beş günden altı aya kadar habis cezasiyle dahi mahkûm olur.

Otuz dördüncü madde — Her tabib İdare-i Sıhhiye Meclisine senedat-ı tıbbiyesini irae ile ruhsat istihsal etmeksizin dahil-i vilayette icra-yı tababet eder ise birinci defada beş lira ceza-yı nakdi itasına ve tekerrür-i töhmetde ceza-yı mezkûrun iki mislini tediyeye mecbur olur.

Yedinci Fasıl

( Baytarlar hakkındadır )

Otuz beşinci madde — Sıhhiye Meclisi azasından olan baytarlar Rumeli-i Şarki Kuvve-i Askeriyesinin dahi serbaytarı olur.