(219)

İdare-i Sıhhiye Kanunu

Kırk Üçüncü Madde
Ebelerin aslâ ameliyât-ı cerrâhiye icrâsına veyahut muâlece itâsına me'zûniyeti yokdur.

Kırk Dördüncü Madde
Madde-i ânifede mestûr memnûiyet-i kânûniyeye mugâyir hareketde bulunan ebe birinci defa yüz kuruşdan beş yüz kuruşa kadar cezâ-yı nakdî ile mucâzât olunur. Tekerrür-i töhmetde işbu cezâ-yı nakdîyi iki kat itâ etmekle berâber bir haftadan bir aya kadar habs cezâsıyla dahi mucâzât kılınır.

Onuncu Fasıl
( Eczacılar Hakkındadır )

Kırk Beşinci Madde
Eczacılık san'atının icrâsına me'zûn olduğunu mübeyyin elinde diploma ve ruhsatnâme olmayan kimesne eczacı dükkânı açamaz ve eczâhâne dahi tutup idâre edemez.

Kırk Altıncı Madde
Hiç bir kimesne birden iki eczacı dükkânı açamaz veyâ tutup idâre edemez.

Kırk Yedinci Madde
Her eczacı dükkânında müdürden başka bir muâvin ve hiç olmaz ise bir çırak olmak lâzımdır.

Kırk Sekizinci Madde
Eczacı dükkânının açılması içün itâ olunan ruhsatnâmede işbu eczacı dükkânı kangı kasaba veyâ karyede ve kasabanın kangı mahallinde açılacağı beyân olunur. Eczâhânenin aslâ bulunduğu köy veyâ kasabadan diğerine veyahut ol kasabanın bir mahallinden diğer mahalline nakli dahi Sıhhiye Meclisinin ruhsatnâmesi olmadıkça câiz değildir.

Kırk Dokuzuncu Madde
İşbu kânun ahkâmına mugâyir hareket eden eczacı birinci defada beş liradan yirmi liraya kadar cezâ-yı nakdî ile mucâzât olunur. İkinci defada işbu cezâ-yı nakdî iki kat olur ve üçüncüsünde eczâhâne kapatır.

Ellinci Madde
Eczâhânelerin müretteb ve idâre-i dâhiliyesi ve eczâların sûret-i hıfz ve kayd ve fürûhtu başkaca tanzîm olunacak bir nizâmnâme-i mahsûs ile beyân ve tasrîh kılınacaktır.