233

(Da'va Vekilleri Hakkında Kanun)

şehadetnamesi dahi rabt edilir ve şayet namzet olanlardan birisi teb'a-i ecnebiyeden bulunduğu halde pasaportunu ibraz eylemesi lazım gelir. İmtihan veremeyecek olan kimsenin tediye olunan imtihan resmi istirdada hakkı olamaz.

Sekizinci Madde: Namzetler bu babda mahsusan tanzim olunmuş olan programa göre vilayetin hukuk-ı sariha ve maddiyesi tahriri üzerine ve şifahi veçhile imtihan olunurlar.

Dokuzuncu Madde: Suret-i matlubede imtihan veren namzetler avukat cedveline kayd olunmakla beraber rüsum-ı kaydiye namıyla bir defaya mahsus olmak üzere altın akçe olarak beş yüz guruş ita ederler ve ondan sonra lazım gelen me'zuniyet kendilerine verilir. Avukatlara dair olan cedvel adliye müdiriyeti dairesinde tutulur ve bunda avukatların esamisi ve mahal-i ikametleri ile yazıhanelerinin mevki ve mahalleri kayd ve işaret olunur. Adliye müdiri her bir imtihan müddetinden sonra cedvel-i mezkurda kayd ve işaret olunmuş olan avukatların isimlerini vilayetin bilcümle mahkemelerine tebliğ ve ihtar eyler.

Onuncu Madde: Altıncı ve sekizinci maddelerde asasen ahz ve istifa olunacak rüsum vilayet mal sandığı menafiine hasr olunur. İmtihan komisyonu azasına miktar-ı münasip ücret-i yevmiye verilir.

* Üçüncü Fasıl *

( Avukatların Hukuk ve Vazâifi Beyanındadır )

On Birinci Madde: Avukatların müvekkilleri tarafından kendilerine tevdi olunan mesalihi nizama tevfikan hüsn-i tesviyeye mecbur olup şöyle ki müvekkillerin hukukunu vicdanen vikaye ve menafiini bir veçh-i hakkaniyet muhafaza ile husul-i menfaatleri yoluna hizmet ve mahsusan taati olunan vekaletname ile nizamat ahkamına mugayir olmayan hususattan hiç birisinin kusur bırakmamasına itina ve dikkat eyleyeceklerdir. Bunlar kendilerine vedia olan hususatı hafi tutmağa mecburdurlar.