242

Rumeli-i Şarkî

Sekizinci madde: Kendi memuriyetine müteferri' bir hizmeti veyahut dîger umûru li-ecli'l-îfâ bir memurun bir mahalden dîger mahalle nakl ve tahvîl-i memuriyeti vukuunda masârif-i râhiye ve ücret-i yevmiyesi içün verilecek akçenin mikdarı ol memurun memuriyet-i cedîdesinde alacağı maaşın mikdarı nisbetinde ta'yîn ve takdîr olunur.

Dokuzuncu madde: Memurînin veyahut hâricden gönderilecek olanların masârif-i râhiyeleriyle ücret-i yevmiyeleri esnâ-yı hareket ve azîmetlerinde gidecekleri mahallerin mesafesiyle nakl-i mekânlarının imtidâd edeceği müddete göre ale't-tahmin bir meblağ verilmek suretiyle ber-vech-i peşin i'tâ olunur.

İrâde-i seniye târîhi fî 13 Rebîü'l-âhır sene 1300 ve fî 9 Şubat sene 1298

***

Eczâ-yı tıbbiyenin sûret-i fürûhtu hakkında Rumeli-i Şarkî'ye mahsus kânûn-ı vilâyetdir.

Nâm-ı nâmî-i Hazret-i Pâdişâhî'ye olarak nizâmnâme-i dâhilînin onuncu ve elli dördüncü maddeleri mûcibince eczâ-yı tıbbiyenin sûret-i fürûhtuna dâir bi't-tanzîm bin sekiz yüz seksen iki senesi Teşrîn-i Sânîsinin yirmi üçüncü günü meclis-i umûmî-i vilâyetden kabûl olunup lede'l-arz mer'iyeti hakkında irâde-i seniye-i Hazret-i Pâdişâhî müteallik ve şeref-südûr buyurulan işbu kânûn hükmünün vâlisi bulunduğum Rumeli-i Şarkî Vilâyetinde mer'i'l-icrâ tutulmasını i'lân eylerim.

Birinci madde: Eczâ-yı tıbbiye sâde veyâ semsiz ve sert veyâhud semli olmak üzere iki kısma taksîm olunur.

İkinci madde: Bi'l-cümle sâde ya'ni semsiz eczâyı bilâ-ruhsat herkes fürûht edebilir fakat eczâ-yı mezkûrenin bozulmaması içün bâi'inin temiz ve mahfûz kâseler derûnunda tutması şartdır.

Üçüncü madde: Eczâ-yı mezkûrenin envâ'ı zîrde beyân olunur.

( 1 Pelin )