83

Tayini lazım gelir ise azanın istihkakı olan yevmiye işde bulunduğu müddetde mülazime verilecektir.
İrade-i seniye tarihi fi 29 Rebiülevvel sene 97 ve fi 28 Şubat sene 95

***

Rumeli-i Şarkî’nin sancak mehakimi nezdinde bir ikinci daire teşkili hakkında eyalete mahsus kanundur

Birinci Madde: Filibe Mahkeme-i Hukukiyesinde birinci ve ikinci daire ismiyle iki ayrı daire teşkil olunacaktır.

İkinci Madde: İşbu dairelerin her biri Rumeli-i Şarkî Nizamnamesi hükmünce hem mevad-ı hukukiye hem mevad-ı ticariye rü’yetine memur ve bir reis ile iki aza-yı daimi ve dört muavin ve iki muavin mülazımından mürekkep olup mahkemede kâfi kâtip ve mübeyyiz ile bir ayrı kalem bulunacaktır.

Üçüncü Madde: Birinci daire reisi reis-i evvel ve ikinci daire reisi reis-i sani unvanıyla mahkemeye havale olunan hususatı beynlerinde taksim edip mahsus bir deftere kayd ettireceklerdir.

Dördüncü Madde: Bir muavin veyahut bir muavin mülazımı devairin ikisine tayin olunabildiğinden mahkemeye havale olunan hususat-ı ticariyenin rü’yetine mahsus günlerde bil-münavebe bakacaklardır.

Beşinci Madde: İki daire memurlarının maaşat-ı mahsusaları sancak mehakimi memurini içün dahil-i bütçe edilen tahsisat dairesinde olacaktır.

Altıncı Madde: İşbu kanun indelhace her sancak mahkemesinde mer’iyyü’l-icra tutulacaktır.

İrade-i seniye tarihi fi 29 Rebiülevvel sene 97 ve fi 28 Şubat sene 95

***

Rumeli-i Şarkî milis küçük zabitan ve neferatının maaş ve me’kulâtı hakkında kanun

Birinci Madde: Milis küçük zabitan ve neferatının me’kulât bedeli yevmi iki buçuk kuruşdan ve bunun bedel-i aynîsi la-akal üç yüz elli dirhem nan-ı aziz ile seksen dirhem sığır ve bunun fıkdanı halinde koyun etinden ibaret olacaktır. Asakir-i merkumenin...