91

Evrak ve senedat içün ne varaka-i sahiha bahası ve ne de mahkeme resmi alınmayacak olup yalnız masarif-i muhakeme ahz edilecektir.

Otuz sekizinci madde — Fakr halleri olduğu mehakim-i istinaf tarafından tasdik ve ilâm olunacak kesân mahkeme ve aklam rusumuyla masarif-i terhiniyeden istisna edilecektir.

Otuz dokuzuncu madde — Rusumdan muafiyet hakkını ispat içün müstedinin kanunun tayin eylediği rusumu tesviye ve te’diyeye iktidarı olmadığına dair sakin olduğu kaza kaymakamı ile ihtiyar meclisi tarafından musaddak usul ve nizamı dairesinde bir şahadetname ibraz etmesi lâzım gelir.

Kırkıncı madde — Yukarıki bendde beyan olunan şahadetnamede muharrer müstedinin emlak ve akar ve sairesini bittedkik fakr halini tasdik veyahut adem-i tasdik mahkemenin kararına menuttur.

Kırk birinci madde — Müstedinin fakr hali sahih olmadığı tahakkuk ettiği halde ceza kanunnamesi hükmünce te’dib olunacaktır.

Kırk ikinci madde — Bir müstedinin fakr hali yalnız istida eylediği maslahatın tesviyesiçün mahkemece makbul olacaktır.

Kırk üçüncü madde — Fakr halini mübeyyin yedinde şahadetname olan müstedinin baladaki bendlerde muharrer olan harc-ı mahkemesi kaza mal sandığından tesviye edilecektir.

Kırk dördüncü madde — Bî-kudret olduğu mahkemece tebeyyün eden müstediler lehine mahkeme tarafından ilâm verildiği halde ahzı lâzım gelen harç rusum varaka-i sahiha bedeli matlubat-ı mahkûmesi meyanında istifa olunacak ve haksız çıkar ise aleyhinde ikame-i dava olunan taraftan alınacaktır.

Kırk beşinci madde — Bî-kudret olduğu mahkemece tebeyyün eden müddei müddeaaleyhinin mahkeme masarifini itadan muaf olamaz.

Altıncı Fasıl
( Mevadd-ı cinaiye hakkında tazminat )

Kırk altıncı madde — Cinayet mahkemelerine verilen her nevi istidanameler varaka-i sahiha rusumundan istisna olunacaktır.

Kırk yedinci madde — Bir mesele-i cinaiyenin icra-yı tahkikatı içün celb ve davet olunacak şahidlerin lâakal günde beş kuruş tazminat talep etmeğe hakları olup...