93

Elli altıncı madde: Deavi-i cinaiyeden münbais hukuk-ı şahsiye müddei davasına hîn-i mübaşeretinde yüzde iki ve esna-yı hüküm ve tahsilinde yüzde bir resm ve harcın mezkûr lazım gelen taraftan ahz edilecektir.

Elli yedinci madde: Masarif-i muhakeme ve tazminat-ı lazime itasına mecbur olan kesan içlerinden bî-kudret ve hiç bir nesnesi olmadığı tahakkuk idenler olur ise evvelkilerden aranılan mahkeme masrafı mal sandığından istida olunacaktır.

İrade-i seniye tarihi fi 27 Receb sene 97

---

Rumeli-i Şarkî'ye mahsus
(İdare-i umumiye nizamnamesidir)

Nizamname-i Dahiliyenin elli beşinci maddesi ve dört yüz doksan beşinci maddesinin ikinci fıkrası ahkâmına istinaden ve meclis-i umumi-i vilayetin encümen-i dâimisiyle müttefikan ber-vech-i âtî mevad-ı nizamiye taht-ı karara alınmıştır.
Nizamname-i Dahili zeyllerinden otuz numaralı zeylin yirmi sekizinci bendi ahkâmına aşağıda zikr olunan maddeler kaim olacakdır.

Birinci madde: Tütüncü esnafı sınıfı âtîde beyan olunduğu üzere patente resmiyle mükellefdir şöyle ki:
Elli haneden ziyade olmayan köylerde bulunan tütüncü dükkânları elli ve elli haneden aşağı ve yüz elli haneden yukarı olmayan köylerde tütüncü dükkânları yüz ikiyüz elli haneden aşağı dört yüz haneden yukarı olmayan karyelerde tütüncü dükkânları iki yüz dört yüz haneden aşağı ve bin haneden yukarı olmayan kurada kâin tütüncü dükkânları üç yüz ve bin haneden yukarı olan kasabat ve kurada bulunan tütüncü dükkânları dört yüz kuruş patente resmi te'diye edeceklerdir.

İşbu resm-i maktû'dan maada başlıca veyahud munhasıran tütün füruht eden esnafdan tütün satdıkları dükkânın icarı veyahud bedel-i icarı nisbetinde yüzde on kuruş ayrıca resm alınır.

Gezginci tütün esnafı senevi yüz kuruş patente resmi verir.