97

Yirmi birinci madde — Cinayat-ı intihabiye ile bir adamın mahkumiyeti hiç bir vechle fesh-i intihabı dâî olamayub ancak divan-ı âli tarafından hüküm verildikten sonra intihab-ı mezkûrun tasdik veyahud intihab nizamnamesinde tayin olunan müddet zarfında kaide hiç bir itiraz vuku bulmadığı cihetle intihab-ı mezkûrun usul ve kaidesinde olduğu divan-ı mezkûr canibinden beyan ve te’yid edilmiş olması lazım gelir. Eğer zikr olunan intihab nizamnamesinin tayin eylediği müddet zarfında zikri sebkat eden itirazname ita olunub da bir me’mur nezdinde alıkonularak mezkûr itiraznamenin hasıl eyleyeceği nüfuz-ı meşruaya halel gelmiş ise o halde me’mur-ı mumaileyh me’muriyetinden azl olunduktan başka kendisinden iki binden üç bin kuruşa kadar cezay-ı nakdî alınır ve fakat böyle bir hal vuku ve zuhurunda dava yeniden rü’yet olunur.

Yirmi ikinci madde — Mevadd-ı sabıkada şerh ve tasrih olunan mevadd-ı cinaiyeden dolayı birisinin keyfiyet-i ithamı ancak cinayetin vuku bulduğu daire-i intihabiye müntehibleri tarafından olunacak dava ve iddia üzerine bina edilecektir.

Yirmi üçüncü madde — Bir intihabın vukuuyla neticesi beyan olunduğu günden itibaren aradan üç ay mürur ettikten sonra işbu kanunda beyan olunan mevadd-ı cinaiye ile intihab-ı mezkûr aleyhinde dava ve itiraz olunacak olursa istima ve kabulü caiz olamayacaktır.

İrade-i seniye tarihi fi 19 Cemaziyelâhir sene 97

Tütüncü esnafından alınacak patente rüsumu hakkında Rum İli Şarkî Vilayetine mahsus kanun

Nizamname-i dahilinin on beşinci ve elli dördüncü ve dörtyüz doksan beşinci maddeleri ahkamına istinaden bin sekiz yüz seksen senesi Teşrin-i Evvelinin yirmi sekizinci günü meclis-i umumi-i vilayetden kabul olunub lede’l-arz meriyeti hakkında irade-i seniye müteallik buyurulan işbu kanunun nam-ı hazret-i padişahi ile olarak valisi bulunduğum Rum İli Şarkî’de neşrini ilan eylerim.

Birinci madde — Nizamname-i dahili dokuz numaralı zeylinin yirmi sekizinci maddesi ahkamı mucibince mevad-ı atiyye karar verilmiştir.

13