101

Ol müddetden ziyade istimal edemez ve edip de yedinde hayvan telef olsa zamin olur.

549 Madde: Filan adam binmek üzere dabbe istikrası sahih olduğu gibi dilediğini bindirmek üzere tamimen istikrası dahi sahihtir.

550 Madde: Rükûb için istikra olunan hayvana yük yükletilemez ve yükletilip de hayvan telef olsa zaman lazım gelir lakin bu halde ücret lazım olmaz (86) maddeye bak.

551 Madde: Filan adam binmek üzere istikra olunan hayvana başkası irkab olunamaz ve irkab olunup da hayvan telef olsa zaman lazım gelir.

552 Madde: Bir kimse dilediğini bindirmek üzere istikra eylediği dabbeye dilerse kendisi rakib olur ve dilerse başkasını irkab eder fakat gerek kendisi binsün ve gerek başkasını bindirsin her kim rakib olur ise murad taayyün ve teşahhus edip andan sonra başkası irkab olunamaz.

553 Madde: Rükûb için bir hayvan istikra olunup da kimin bineceği tayin ve dilediğini bindirmek üzere deyu tamim olunmasa icare fasid olur fakat kable'l-fesh tayin ve beyan olunur ise sıhhate munkalib olur ve bu surette dahi her kim tayin eder ise andan başkası ol hayvana irkab olunamaz.

554 Madde: Yük için hayvan istikra olundukda semer ve ip ve çuval hakkında örf-i belde muteberdir.

555 Madde: Yükün mikdarı beyan yahud işaretle tayin edilmeyerek hayvan istikra olundukda mikdarı örf ve adete mahmul olur.

556 Madde: Müstecir kira hayvanını sahibinin izni olmaksızın darb edemez ve darb edip de andan naşi hayvan telef olsa zamin olur.

557 Madde: Kira hayvanını darb etmek üzere sahibi izin verdiği surette müstecir ancak darb-ı mutad olan yerine vurabilir ve eğer darb-ı mutad olan mevziden başka yerine darb ile mesela sağrısına