114

Binâenaleyh filân adamın filân adama olan borcuna kefîlim dedikde borcun mikdârı ma’lûm olmasa dahi kefâlet sahîh olur.

631 Mâdde Kefâlet bi’l-mâlde mekfûlun bih asîl üzerine mazmûn olmak ya’nî asîl üzerine îfâsı lâzım olmak şartdır.
Binâenaleyh semen-i mebî’e ve bedel-i icâreye ve sâir duyûn-u sahîhaya kefâlet sahîh olur.

Kezâlik mâl-ı mağsûba kefâlet sahîh olub lede’l-mutâlebe kefîl bunu aynen yâ bedelen îfâya mecbûr olur.
Ve kezâ sevm-i şirâ tarîkıyle makbûz olan mâla semen tesmiye olunmış ise kefâlet sahîhdir.

Ammâ kable’l-kabz mebî’in aynine kefâlet sahîh olmaz.
Zîrâ ayn-ı mebî’ bâyi’ yedinde telef olsa bey’ münfesih olacağından bâyi’ üzerine mazmûn olmayub yalnız semeni kabz etmiş ise reddi lâzım gelir.
Kezâlik merhûn ve müsteâr ve me’cûr ve emânât-ı sâire asîl üzerine mazmûn olmadığından bunların aynlerine kefâlet sahîh olmaz.
Fakat mekfûlun anh bunları izâa ve istihlâk eder ise kefîlim dese sahîh olur.
Ve bir de gerek mebî’in ve gerek bunların teslîmine kefâlet sahîh olur.
Ve lede’l-mutâlebe bir vechle hakk-ı habsleri yoğise kefîl bunları teslîme mecbûr olur.
Ancak kefâlet bi’n-nefsde mekfûlun bihin vefâtile kefîl berî olduğu gibi bunlar telef olduğu takdîrde dahi kefîle bir şey lâzım gelmez.

632 Mâdde Ukûbâtda niyâbet cârî olmaz.
Binâenaleyh kısâsa ve sâir ukûbât ve mücâzât-ı şahsiyeye kefâlet sahîh değildir.
Ammâ cârih ve kâtil üzerine lâzım gelen erş ve diyete kefâlet sahîhdir.

633 Mâdde Mekfûlun anhın yesârı şart olmayub müflise dahi kefâlet sahîh olur.

Bâb