115

( Bâb-ı Sânî )

( Kefaletiñ ahkâmı beyânında olup üç faslı hâvîdir )

( Fasl-ı Evvel )

( Kefalet-i müneccize ve muallaka ve muzâfe’niñ hükmü beyânındadır )

634 Madde — Kefaletiñ hükmü mütâlebedir.
Ya‘ni mekfûlün leh’iñ kefilden mekfûlün bih’i mütâlebeye hakkı olmaktır.

635 Madde — Kefalet-i müneccizede deyn eğer asîl hakkında muaccel ise derhâl ve müeccel ise müddet-i muayenesiniñ temâmında kefîl mütâleb olur.
Meselâ bir kimse biriniñ borcuna kefîl oldum dedikde, borç eğer muaccel ise derhâl ve müeccel ise müddeti hitâmında, dâin alacağını kefîlden mütâlebe edebilir.

636 Madde — Ammâ bir şarta muallak ve zamân-ı müstakbele muzâf olarak mün‘akid olan kefaletde, şart tahakkuk ve zamân hulûl etmedikçe kefîl mütâleb olmaz.
Meselâ falan adam seniñ alacağını vermez ise edâsına kefîlim dedikde kefalet meşrûtan mün‘akid olup lede’l-mütâlebe ol adam borcunu vermez ise kefîlden mütâlebe olunur yoksa asîlden kable’l-mütâlebe kefîl mütâleb olmaz.

Kezâ falan adam seniñ malıñı sirkat eder ise ben zâminim dese kefalet sahîh ve ol adamıñ sirkati sâbit oldukda, kefîl mütâleb olur.

Ve kezâ mekfûlün leh ne vakit mütâlebe eder ise şu kadar gün mühlet verilmek üzere kefîl olsa mekfûlün leh’iñ mütâlebe etdiği vakitden i‘tibâren ol kadar gün mühlet verilip eyyâm-ı mezkûreniñ mürûrundan soñra mekfûlün leh her ne vakit ister ise mütâlebe eder ve kefîliñ tekrâr o kadar gün istid‘âsına selâhiyeti olmaz.

Kezâlik falan’da sâbit olacak alacağına veyâ falan’a ikrâz edeceğiñ meblağa yâhud falanıñ senden gasp edeceği şey’e veyâhud falan’a satacağıñ malıñ semenine kefîlim dedikde, kefîl ancak bu ahvâliñ tahakkukunda ya‘ni borcuñ sübûtu ve akçeniñ ikrâzı ve gaspıñ tahakkuku ve malıñ bey‘ ve teslîmi vukû‘unda mütâleb olur.