119

654 Madde: Bir müddet-i ma^lûme ile müeccel olan deyne ol müddet ile müeccel olarak kefâlet sahîh olduğu gibi andan ziyâde müddet ile müeccel olarak kefâlet dahi sahîh olur.

655 Madde: Dâyin alacağını asîl hakkında te'cîl eder ise gerek kefîl ve gerek kefîlü'l-kefîl hakkında dahi te'cîl etmiş olur. Ve kefîl-i evvel hakkında te'cîli kefîl-i sânî hakkında dahi te'cîl olur. Ammâ kefîl hakkında te'cîli asîl hakkında te'cîl değildir.

656 Madde: Müeccelen medyûn olan kimse kable hulûli'l-ecel âhar diyâra gidecek olub da dâyini hâkime mürâcaatle andan kefîl istedikde kefîl vermeğe mecbûr olur.

657 Madde: Bir kimse birine benim falan kimseye olan borcuma kefîl ol deyib ve o dahi kefîl olub da kefâlet hasebiyle borcu edâ ettikten sonra asîle rücû^ edecek oldukda kefîl olduğu şeyle rücû^ eder müeddâya i^tibâr olunmaz.
Ammâ borcun bir mikdârı üzerine dâyin ile musâlaha ettiği takdîrde verdiği bedel-i sulh ile rücû^ eder yoksa mecmû^-ı deyn ile rücû^ edemez.
Meselâ meskûkât-ı hâliseye kefîl olub da mağşûş akçe ile te'diye etse asîlden meskûkât-ı hâlise alır ve bi'l-akis mağşûş sikkeye kefîl olub da meskûkât-ı hâlise ile te'diye eylese asîlden mağşûş sikke alır.
Kezâlik şu kadar kuruşa kefîl olub da sulhan ba^zı eşyâ i^tâsıyla te'diye eylese asîlden kefîl olduğu mikdâr akçeyi alır.
Ammâ bin kuruşa kefîl olub da sulhan beşyüz kuruş ile te'diye eylese asîlden beşyüz kuruş alır.

658 Madde: Akd-i muâvaza zımnında bir kimse birini aldatmış olsa zararına dâmin olur.
Meselâ bir kimse bir arsa iştirâ edib de üzerine binâ yapıldıktan sonra müstehak çıkub da zabt olunsa müşteri bâyi^den arsanın kıymetini aldıktan başka binânın hîn-i teslîmindeki kıymetini dahi alır.
Kezâlik bir kimse ehl-i sûka işbu sagîr oğla mal satınız ana ticâret içün...