131

Birine olan deyni eda etse rehniñ nısfını istirdad edemeyüb ikisiniñ dahi alacağını tamamen ifa etmedikçe rehni tahlise salahiyeti yokdur.

740 Madde: İki medyundan bir rehin almış olan kimse ikisinde olan alacağını tamamen istifa edinceye dek rehni imsak edebilir.

741 Madde: Rehni rahin itlaf yahud ta’yib etdikde zamin olması lazım geldiği gibi mürtehin itlaf yahud ta’yib etdikde dahi kıymeti mikdarı deynden sakıt olur.

742 Madde: Ahar bir kimse rehni itlaf etse yevm-i itlafındaki kıymetini verir ve ol kıymet mürtehin indinde rehin olur.

( Fasl-ı Sani )

( Rahin ve Mürtehiniñ Rehinde Tasarrufları Hakkındadır )

743 Madde: Rahin ve mürtehinden biriniñ izni olmaksızın diğeriniñ rehni başka bir kimseye rehin etmesi batıldır.

744 Madde: Mürtehiniñ iznile rahin rehni digere rehin etse rehin evvel batıl ve rehin sani sahih olur.

745 Madde: Rahiniñ iznile mürtehin rehni rehin etse rehin evvel batıl ve rehin sani rehin müstear kabilinden olarak sahih olur.

746 Madde: Rahiniñ rızası olmaksızın mürtehin rehni satdukda rahin muhayyer olub dilerse bey’i fesih eyler dilerse icazet ile tenfiz eyler.

747 Madde: Mürtehiniñ rızası olmaksızın rahin rehni satdukda bey’i nafiz olmaz ve mürtehiniñ hakk-ı hapsine halel gelmez.
Fakat borc ifa olunursa ol bey’ nafiz olur.
Ve keza mürtehin ol bey’e icazet verse nafiz olub rehin dahi rehniyetden çıkarak borc hali üzere kalur ve mebiin semeni mebi’ makamında rehin olur.
Ve eğer mürtehin icazet vermez ise müşteri muhayyer olub dilerse rehniñ fekkine kadar bekler ve dilerse hakime müracaat ile bey’i fesih etdirir.

748 Madde: Rahin ve mürtehinden biri diğeriniñ iznile rehni ahar bir kimseye iare edebilir ve ba’dehu her biri anı rehniyete iade edebilir.