135

Amma sahibine virmek üzere aldığı suretde eğer sahibi ma'lum ise yedinde
sırf emanetdir sahibine teslim itmesi lazım gelir
Ve eğer sahibi ma'lum değilse lükatadır ki mültekıt olan ya'ni bulup alan
kimse yedinde emanetdir

770 Madde Mültekıt bir lükata bulduğunu i'lan etdirir
ve sahibi zuhur edinceye dek nezdinde emanet olmak üzere hıfz eder ve bir kimse
zuhur ile kendi malı olduğunu isbat eder ise aña teslim itmesi
lazım gelir

771 Madde Bir kimse nezdinde digerinin malı kazaen telef olduğu suretde eğer
sahibinin izni olmaksızın almış ise beher hal zamin olur
Ve eğer sahibinin izniyle almış ise yedinde emanet olmakla zamin olmaz
Fakat sevm-i şira suretinde semen tesmiye olundığı halde zaman lazım gelir
Mesela bir kimse sırçacı dükkanından hod-be-hod bir kase alup da elinden
düşerek kırılsa zamin olur
Ve eğer sahibinin izniyle alup da nazar eder iken kazaen yere düşüp kırılsa
zaman lazım gelmez ve ol kase diger bir takım kaseler üzerine düşerek
kırılup anları dahi kırsa bu kaselerin zamanı lazım gelir ancak ol kase
emanet olmakla yine anın zamanı lazım gelmez
Amma bu kase kaç kuruşadır deyip dükkancı dahi şu kadar kuruşadır
al dedikden sonra eline alup da yere düşerek kırılsa zamin olur
Kezalik bir kimse şerbet içerken şerbetcinin bardağını elinden düşüp de
kırılsa ariyet kabilinden emanet olmakla zaman lazım gelmez
Fakat kendisinin su-i isti'malinden naşi düşmüş ise zamin olur

772 Madde Delaleten izin sarahaten izin gibidir
Fakat sarahaten nehiy var ise delalete i'tibar olunmaz
Mesela bir kimse birinin izniyle hanesine dahil oldukda meydanda duran kadeh
ile su içmeğe delaleten me'zundur
Ve su içerken kazaen yedinden kadeh düşüp de kırılsa zaman lazım gelmez
Fakat sahib-i hane ol kadehe dokunma deyu nehiy etmiş iken eline alup da
düşerek kırılsa zamin olur