150

852 Madde: Bir tıfla âhar kimesne bir şey hibe ettikde velisinin yâhud mürebbîsinin kabzı ile hibe temâm olur.

853 Madde: Sabiyy-i mümeyyize bir şey hibe olundukda velisi olmasa bile kendisinin kabzıyla hibe temâm olur.

854 Madde: Hibe-i muzâfe sahîh değildir.
Meselâ gelecek ay başından i'tibâren şu malı sana hibe ettim dese sahîh olmaz.

855 Madde: Ivaz şartıyla olan hibe sahîh ve şart mu'teberdir.
Meselâ bir kimesne şu makûle ivaz vermek yâhud kendisinin ma'lûmu'l-mikdâr deynini edâ etmek şartıyla birine bir şey hibe ettikde mevhûbün leh ol şarta ri'âyet eder ise hibe lâzım olur etmez ise vâhib dahi hibesinden rücû' edebilir.
Kezâlik bir kimse ölünce kendisini beslemek şartıyla mülk-i akarını birine hibe ve teslîm ettikde mevhûbün leh şart-ı mezkûr üzere vâhibi beslemeğe râzı iken vâhib nâdim olup da hibesinden rücû' ile ol akarını istirdâd edemez.

(Fasl-ı Sânî)
(Şerâit-i Hibe Beyânındadır)

856 Madde: Mevhûbun vakt-i hibede mevcûd olması şartdır.
Binâenaleyh bir bağın hâsıl olacak üzümünü yâhud bir kısrağın doğacak yavrusunu hibe sahîh değildir.

857 Madde: Mevhûb vâhibin malı olmak şartdır.
Binâenaleyh bir kimesne bilâ-izin başkasının malını birine hibe etse sahîh olmaz.
Fakat hibe ettikden sonra sâhibi tecvîz olsa sahîh olur.

858 Madde: Mevhûbun ma'lûm ve mu'ayyen olması lâzımdır.
Binâenaleyh vâhib lâ-ale't-ta'yîn malımdan bir şeyi yâhud şu iki atdan birini hibe ettim dese sahîh olmaz.
Ve bu iki atdan hangisini dilersen senin olsun dediği sûretde eğer mevhûbün leh meclis-i hibede anlardan birini ta'yîn eyler ise sahîh olur ammâ meclis-i hibeden ba'de'l-mufâraka ta'yîni müfîd olmaz.

859 Madde: Vâhibin âkil ve bâliğ olması şartdır.