159

( Bab-ı Sani )
( İtlaf beyanında olub dört faslı havidir )
( Fasl-ı Evvel )
( Mübaşeret-i itlaf hakkındadır )

912 Madde — Bir kimse diğerin gerek kendisinde ve gerek emini yedinde olan malını gerek kasden ve gerek min gayri kasd itlaf etse zâmin olur. Amma gasıb yedindeki mal-ı mağsubu âhar kimse itlaf etse mağsubun minh muhayyerdir dilerse gasıba tazmin ettirip o dahi mütlife rücu eder ve dilerse mütlife tazmin ettirip mütlif bu suretde gasıba rücu edemez.

913 Madde — Birinin ayağı kayıp da düşerek âharın malını itlaf etse zâmin olur.

914 Madde — Bir kimse kendi malı zannıyla diğerin malını itlaf etse zâmin olur.

915 Madde — Bir kimse diğerin elbisesini çekip de yırtsa tamam kıymetini zâmin olur. Amma elbiseye teşebbüs edip de sahibi çekmekle yırtılsa nısf kıymetini zâmin olur.
Kezalik bir kimse diğerin eteği üzerine oturup da sahibi bilmeyerek kalkmakla elbisesi yırtılsa o kimse elbisenin nısf kıymetini zâmin olur.

916 Madde — Bir sabi diğerin malını itlaf etse kendi malından zaman lâzım gelir malı yok ise hal-i yüsrine intizar olunur velisine tazmin ettirilmez.

917 Madde — Bir kimse diğerin malına kıymetçe bir gûne noksan getirse noksan-ı kıymeti zâmin olur.

918 Madde — Bir kimse diğerin hane ve dükkân misillü akarını bi-gayri hakkın hedm etse sahibi muhayyerdir dilerse enkazını hedm eden kimseye terk ederek mebniyen kıymetini tazmin ettirir ve dilerse ol akarın mebniyen kıymetinden enkazın kıymeti tenzil ve kıymet-i bakiyeyi tazmin ile beraber enkazı dahi alıkor. Fakat gasıb anı ke'l-evvel bina ediverirse zamandan beri olur.

919 Madde — Bir mahallede harik vuku bulmakla bir kimse bir haneyi sahibinin...