199

Sâire ile ol arâziden ibâretdir bu makûle çiftlikât ashâbından biri aslâ
vârisi ve hakk-ı tapu ashâbından kimesnesi olmadığı hâlde vefât eylerse çiftliği
cânib-i mîrîden bi'l-müzâyede tâlibine verilir ve eğer arâzinin hakk-ı intikâline nâil
olan veresesi olduğu hâlde vefât edip de zikr olunan ebniye ve hayvanât
ve tohum ve sâire diğer vârislere intikâl eylerse mahlûlât faslında beyân olunduğu
vechile bu vârislerin ol çiftliğe tebaiyetle zirâat ve tasarruf olunan arâzide
hakk-ı tapusu olacağından arâzi-i merkûme dahi tapu-yı misl ile anlara
tefvîz olunur ve eğer istinkâf ederler ise kendilerine mevrûs olan
emlâk ve eşyâya dokunulmayarak yalnız arâzi-i merkûme bi'l-müzâyede tâlibine
tefvîz kılınır.

Yüz otuz ikinci madde Her kim izn-i sultânî ile deryâdan bir mahalli imlâ eyler ise
ol mahalle mâlik olur ve izin alıp da üç sene doldurmaz ise anda bir hakkı
kalmayıp diğeri bâ-izn-i sultânî ol mahalli imlâ ile temellük edebilir ve eğer
bir kimse bilâ-izin deryâdan bir mahalli doldurur ise orası beytü'l-mâlin olup
cânib-i mîrîden bedel-i misl ile ol kimseye ve istinkâf eylediği sûretde
bi'l-müzâyede tâlibine satılır.

Hâtime İşbu kânunnâme-i hümâyûn ilânı târîhinden i'tibâren mer'iyyü'l-icrâ
olup şimdiye dek gerek arâzi-i mîriye ve gerek tahsîsât kabîlinden olan
arâzi-i mevkûfe hakkında mukaddem ve muahhar sâdır olan evâmir-i aliyyeden bunun
ahkâm-ı mündericesine mugâyir olanların ahkâmı münfesih olduğundan evâmir-i
merkûmeye binâen meşâyihü'l-islâm taraflarından verilmiş olan fetâvâ ile iftâ ve amel
olunmayarak fîmâ-ba'd bâb-ı fetvâ-penâhîde ve aklâm-ı şâhânede ve bi'l-cümle mehâkim
ve mecâlisde ancak bu kânunnâme-i münîf-i sultânî destûrü'l-amel olacakdır ve dîvân-ı
hümâyûn kaleminde ve defterhâne-i âmirede ve mahâll-i sâirede arâzi-i mîriye ve mevkûfeye
dâir nizâmât ve kavânîn-i atîkaya i'tibâr kılınmayacakdır.

Fî 7 N [Ramazan] sene 1274