231

Müracaat edeceklerdir ve ecanibin mutasarrıf oldukları emlake ait olan hususat zatlarına mahsus sıfat-ı tabiiyet-i asliyelerinin müdahalesi olmaksızın ve muahedat iktizasınca zatlarına ve emval-i menkulelerine ait olan muafiyat muhafaza olunmak kaydıyla tebaa-i Devlet-i Aliyye’den olan ashab-ı emlakin haiz oldukları hukuk ve mükellef oldukları şerait ve tabi oldukları usul üzere rüyet olunacaktır.

Üçüncü Madde: Emlake mutasarrıf bir ecnebinin iflas halinde sendikleri yani tesviye memurları müflisin uhde-i tasarrufunda olup mahiyet ve nizamen mutasarrıfın düyununa karşılık olması mecaz olan emlakin satılması için hükümet ve mehakim-i resmiye-i Devlet-i Aliyye’ye müracaat edecektir ve bir ecnebi mutasarrıf-ı emlak olan bir ecnebi aleyhinde emlakten maada bir maddeden dolayı davası olup da kançılaryası hükmüyle davasını kazandığı halde dahi bu hüküm mahkum olan ecnebinin ifa-yı deynine salih olan emlakinin satılmasını istilzam eyledikte kezalik hükümet ve mehakim-i Devlet-i Aliyye’ye müracaat olunarak satılması dain tarafından iddia ve talep olunan emlakin deyne bedel satılması nizamen mecaz olan sınıftan olup olmadığı evvel emirde mehakim ve hükümet-i Osmaniye tarafından ba‘de’t-tahkik icra olunacaktır.

Dördüncü Madde: Bir ecnebi vasiyet ile intikali ve hibesi mecaz olan emlakini vasiyet etmek salahiyetine nail olup hibe veyahut vasiyet olunmayan veyahut hibe ve vasiyet salahiyetine kavanin-i Devlet-i Aliyye’nin mesağı bulunmayan emlak-i metruke hakkında nizamat-ı mevzua-i Devlet-i Aliyye icra olunacaktır.

Beşinci Madde: Her bir ecnebi istimlak hakkında icrasıçün taraf-ı Devlet-i Aliyye’den teklif olunan suret-i tanzimiyeye mensup olduğu devlet tarafından muvafakat olunduğu gibi işbu kanunname ahkamı fevaidinden istifade eyleyecektir.