237

Terhîn-i emlâk hakkında mevâdd-ı nizâmiyedir

Birinci madde: Bir mülkün terhîninde ibtidâ o mülkün başka yere terhîn edilmek ve sekuestro tahtında bulunmak gibi ilişiği olmadığını musaddık mahalle veyâ karyesi muhtârı ve ihtiyâr meclisi tarafından mühür birle ve ilmühaber ahz ile re's-i livâda ise meclis-i temyîz ve kazâda ise deâvî meclisine ibrâz olunacak ve meclisçe bilâ-te'hîr o mülkün senedâtı muâyene ve bir gûne ilişiği olmadığı tahkîk olunduktan sonra ilmühaberi hıfz olunarak bir ruhsatnâme verilip o ruhsatnâme mülkün bulunduğu kazâ mahkeme-i şer'iyyesine bi'l-irâe oradan rehin hücceti alınmak lâzım gelecektir.

İkinci madde: Deâvî ve temyîz mecâlisinde muâmelât-ı terhîniye içün bir defter tutulup bir mülk hakkında terhîn ruhsatnâmesi verildiği anda o deftere kayd olunacak ve rehnin hîn-i fekkinde mecâlis-i mezbûreye bi'l-mürâcaa kaydı tashîh ettirilecektir.

Üçüncü madde: Bu muâmelâtın icrâsında ihtiyâr ve deâvî ve temyîz mecâlisinden harc ve resm alınmayıp yalnız mahkeme-i şer'iyye tarafından hüccet harcı alınacaktır.

İrâde-i seniye târîhi fî 21 Rebîülâhir sene 87
Ve fî 8 Temmuz sene 86