251

( Tarifnâme )

Arazi-i mevkufenin ahkâm-ı kanuniyesi bin ikiyüz yetmiş dört senesi
Zilhiccesi evailinde ilan olunan Arazi Kanunname-i Hümayununa tevfik
olunması irade-i seniye muktezasından olarak şimdiye kadar mer’iyyü’l-icra
tutulmakda olup arazi-i mevkufe memurlarının vezaifi ve muamelat-ı sairesi
dahi mümkün mertebe arazi-i emiriye usulüne tatbik olunmak lazımından ve bu defa
kaleme alınan taşra senedat nizamı icabınca bundan böyle verilecek temessükatın
bir hüsn-i zabıta ve nizam altına konulması icab-ı maslahatdan bulunmuş olduğundan
müsakkafat ve müstagellat mutasarrıflarına verilmesi lazım gelen temessükatın Evkaf-ı Hümayun
Hazinesinden vüruduna kadar Evkaf müdürleri taraflarından verilmekde olan
muvakkat ilmühaberlerin yerine bu kere matbu ilmühaber cedvelleri tanzim olunmuş
olmasiyle şimdiye kadar mahallerinde harcı ve bedeli alınıp muvakkaten verilmiş olan
ilmühaberlerin işbu matbu ilmühaberlerle tebdili iktiza etmeyip bundan böyle
verilecek temessükat için işbu matbu ilmühaberlerden verilmesi mukarrer
bulunduğundan zikr olunan matbu ilmühaber cedvelleri hakkında icrası
iktiza eden muamelatın izahı zımnında işbu tarifnâme tanzim kılınmıştır.

Birinci bend: Zikr olunan ilmühaber cedvelleri mücelled defter suretinde olup
işbu defterde her evkaf müdürü bulunan mahal için birden bed’ ile başka başka
numaralar mevzu’dur. Beher defter ikiyüz ilmühaber varakasını ve her ilmühaber varakası
üç cedveli şamildir. Ve her defterdeki ilmühaberler soldan bed’ ile bir numara
vaz’ olunarak sırasiyle ikiyüze kadar numara konularak kullanılacaktır.
Ve ne yolda kullanılacağı izah olunmak için suver-i mütenevviada matbu
numune cedvellerinin balalarına ayrıca numaralar vaz’ olunarak liecli’t-ta’lim
her evkaf müdürü olan mahalle on aded cedvel ve Hazineye irsal
olunacak ziri mazbatalı bir aded suret-i defter dahi irsal olunacaktır.

İkinci bend: Gerek ferag ve intikal vukuunda ve gerek senedi olmayanlara sened verildikde
ve gerek atik senedlerin tebdilinde el-hasıl numune varakalarında gösterildiği üzere