261

Bakılmayarak bu makule gediklerin mübayaa ve muhakeme ve hususat-ı sairesiçün hiç bir tarafdan ilam ve hüccet misillü sened ita kılınmayacaktır ve bu makule gediklerin müstakar olduğu mahalden ihracına mülk sahiblerinin salahiyeti olacaktır.

Dokuzuncu Madde: İstanbul ve bilad-ı selasede kâin uncu ve ekmekçi ve francalacı ve duhancı gediklerinde dahi beşinci ve altıncı ve yedinci maddelerde beyan olunan ahkam icra olunup fakat gedikat-ı mezkure içün kırk yedi tarihinden işbu yetmiş yedi tarihine gelinceye kadar verilmiş olan aklam suretlerine dahi itibar olunup icra olunacak tahkikat üzerine mübayaa ve hususat-ı sairesi icra olunacaktır.

Onuncu Madde: Mülkiyetde kalmış olan bilcümle gedikatın hibe ve intikal ve rehin misillü hususatile muhakemat-ı vakıasında beşinci ve altıncı ve yedinci ve sekizinci ve dokuzuncu maddelerde beyan olunan ahkam ve muamelat tamamile icra olunacaktır.

On Birinci Madde: Esnaf kethüdaları hazır olmadıkça ve yedlerinden ilmühaber alınmadıkça ber-vech-i mülkiyet tasarruf olunmakda bulunan gediklerin mübayaa ve hususat-ı sairesi icra olunmayacaktır.

On İkinci Madde: Evamir-i aliyye ve ya kalem ilmühaberi ile ber-vech-i mülkiyet tasarruf olunmakda olup mahalleri mezkur evamir ve ilmühaberde tayin olunan veyahud mahalleri gösterilmeyerek yalnız adedleri tasrih kılınan gedikler hakkında mevad-ı sabıkada beyan edilen muamele tamamile icra olunacaktır.

On Üçüncü Madde: Bilcümle gedikat-ı memluke içün verilecek hüccetlerde gedikat-ı mezkure müstakar olduğu mahallerin kadim mülk kirası ne mikdar ise tasrih ve hudud-ı erbaası ve tevabi ve levahık-ı kadimesi dahi beyan ve tavzih olunacaktır.

On Dördüncü Madde: Gedikat ashabının rıza ve muvafakatleri munzam olmadıkça kadim mülk kiraları tezyid olunmayacaktır.

On Beşinci Madde: Senedat-ı sahiha ve mutebere ile ber-vech-i mülkiyet tasarruf olunmakda bulunan gediklerin müstakar oldukları mahalden ihrac ve imhası zımnında mülk...