266

On İkinci Madde
Mukavelesi icra edilmiş olan emlak ve akar ve saireden kazaen muhterik veyahut münhedim olanların mukavelesi tabiatıyla münfesih olacağından eğer kirası peşin verilmiş ise kontrato müddetinden müstecirin ikamet eylediği müddetin bakisine isabet eden hisse-i icare sahib-i mülk tarafından müstecire red olunacaktır.

On Üçüncü Madde
Bir müstecir hakkında komşuları tarafından şikayet olunur da şikayet-i vakıa hükümet nezdinde karin-i kabul olur ise mucir ve müstecirin rızalarına bakılmayarak hükümet marifetiyle fesih-i mukavele olunup ol müstecir ihrac edilecektir.

On Dördüncü Madde
Sahib-i mülk diğerinin taht-ı isticarında bulunan mülkünü ahara bey eylediği takdirde müsteciri ihrac eylemek şartını mukavele senedine derc etmemiş ise mukavele müddeti munkaziye oluncaya kadar sahib-i cedidi müsteciri ihrac edemeyecektir ( Mensuh )

On Beşinci Madde
Mukavelesi ifa edilmiş olan bir mülkün mukavelenin haricinde derununda iskan müteazzir olacak surette tamiratı zuhurunda müsteciri ihbar eder ise esna-yı tamirde güzeran edecek müddetin kirası mukavelenin ilerisinde ikmal olunmak üzere bil-terazi kararlaştırılamaz ise ol müddete isabet eden hisse-i icare tenzil kılınacaktır ( Mensuh )

On Altıncı Madde
Mukavele senedinde münderic olmadığı halde müstecir tarafından hod-be-hod bazı tamirat icra olunur veyahut bazı şeyler yaptırılır ise bunun için mucirden kat’a bir şey iddiasına salahiyeti olamayacaktır ( Mensuh )

On Yedinci Madde
Hane ve dükkan ve her nevi emlak ve arazinin mukavele senedi tanzim olunmaksızın icareye verildiği haber alındığı veyahut mucir ile müstecir beyninde münaza’a zuhuriyle hükümete müracaat edildiği halde emlak mutasarrıflarından bedel-i icarın yüzde üçüne müsavi bir cezay-ı nakdi ahzıyla mukavele senetleri ita ve hükümetçe davaları rüyet kılınacaktır.

On Sekizinci