297

Ve bir terekenin gerek tahsilatı ve gerek hususat-ı sairesi nihayet üç mahda arkası alınarak behemehal defter-i kassamı tanzim kılınacaktır ve müddet-i mezkûre zarfında tereke bila-sebeb tesviye olunmayıp da kalır ise terekelerin tesviyesine memur olanlar taht-ı mesuliyette kalacaktır.

Yirmi Sekizinci Madde
Hazret-i Halid vakfı hududu dahilinde Sultan Ahmed Han-ı Evvel vakfına muhassas Galata ve tevabii dahilinde kâin müsakkafat ve müstegallatda sakin olanların varis-i gaibi olduğu veyahut aslen varisi olmadığı halde vasiyet ve ikrar-ı mülk ve hibe misillü hususatı behemehal Beytülmal-i Evkaf Müdürü veya vekili hazır olarak canib-i Mahkeme-i Teftişden rüyet ve tesviye olunup mehakim-i saireden tesviye olunmayacaktır.

Yirmi Dokuzuncu Madde
Madde-i sabıkada beyan olunan iki vakfın maada evkaf-ı saire-i malume hudud ve müsakkafat ve müstegallatında sakin olanların vasiyet ve ikrar-ı mülk ve hibe gibi hususatı Evkaf Beytülmalı Müdürü marifetiyle canib-i teftişden tesviye olunacağı misillü mehakim-i saireden dahi tesviye olunabilecektir.

Otuzuncu Madde
Fasl-ı evvelde zikr olunan evkaf-ı şerife hudud ve müsakkafat ve müstegallatında zuhur edip sahibi gaybet-i munkatıa ile gaib ve mefkud olan emval ve eşya canib-i Beytülmal-i Evkaf'tan tahrîz ve hakkında fasl-ı sanide beyan olunan ahkam ve muamelat tamamıyla icra olunacaktır.

( Hatime )
İşbu nizamname ilanı tarihinden itibaren mer'iyyü'l-icra olup şimdiye kadar Evkaf Beytülmalı tarafından tahrir olunan tereke ve müteferriat-ı sairesi hakkında mukaddem ve muahhar sadır olan evamir-i aliyye ve nizamat-ı müesseseden bunun ahkam-ı mündericesine mugayir olanların ahkamıyla amel olunmayarak ancak bu nizamname desturü'l-amel olacaktır.

L 38