30

Suret-i Hatt-ı Hümayun
mucibince amel oluna

( Mukaddime )

( İki makaleyi havidir )

( Makale-i Ula )

İlm-i fıkhın tarif ve taksimi hakkındadır

1 Madde İlm-i fıkıh mesail-i şer'iye-i ameliyeyi bilmektir

Mesail-i fıkhiye ya emr-i ahirete taalluk eder ki ahkam-ı ibadattır veyahud emr-i
dünyaya taalluk eder ki münakehat ve muamelat ve ukubat kısımlarına taksim
olunur şöyle ki Cenab-ı Hakk bu nizam-ı alemin vakt-i mukaddere dek bekasını
irade edip bu ise nev-i insanın bekasına ve nev'in bekası tenasül ve tevalid
içün zükûr ve inasın izdivacına menuttur ve bir de nev'in bekası
eşhasın adem-i inkıtaıyla dır insan ise itidal-i mizacı hasebiyle
bekada gıda ve libas ve meskence umur-ı sınaiyeye muhtaç olur bu dahi efradı
beyninde teavün ve iştirak husulüne tevakkuf eder el-hasıl insan medeni
ü't-tab' olduğundan sair hayvanat gibi münferiden yaşayamayıp bast-ı bisat-ı
medeniyet ile yekdiğere muavenet ve müşarekete muhtaçtır halbuki her şahs
kendüye mülayim olan şeyi taleb ve müzahim olan şeye gazab eder
olduğundan beynlerinde adl ve nizamın halelden mahfuz kalması içün gerek
izdivac ve gerek mabehi't-temeddün olan teavün ve iştirak hususlarında birtakım
kavanin-i müeyyide-i şer'iyeye muhtaç olur ki evvelkisi fıkhın münakehat kısmı
ve ikincisi